अमरावती : नायजेरियन टोळीपैकी एकाला ताब्यात घेण्यासाठी आंध्र प्रदेशच्या सीआयडी पोलिसांचे चार जणांचे पथक अमरावतीमध्ये दाखल झालेले आहे. 66 लाखांच्या अपहारप्रकरणी 2018 मध्ये राजापेठ ठाण्यात गुन्हा दाखल झाला होता.
या अपहारप्रकरणात दोन नायजेरियन युवकासह त्यांची एक वैदर्भीय मैत्रीण अशा एकूण सात जणांविरुद्ध फसवणूक, अपहारप्रकरणी गुन्हा दाखल झाला होता. त्यापैकी फिलीप इफेसिनाची ऊर्फ डॉ. जानसन बोबो हा नायजेरियन न्यायालयीन कोठडीत अंतर्गत अमरावतीच्या मध्यवर्ती कारागृहात आहे. मात्र, त्याच्या वैदर्भीय मैत्रिणीला जामीन मिळाला आहे.
अकीकबरा या सीड्‌सचा पुरवठा करण्याच्या नावाखाली शहरातील एका मोठ्या व्यापाऱ्यासोबत या टोळीने खोटे नाव सांगून, संपर्क साधला होता. त्यापैकी डॉ. जानसन ऊर्फ बोबो असे बनावट नाव सांगून फिलीप इफेसिनाची हा अमरावतीत या व्यापाऱ्याच्या घरापर्यंत पोहोचला होता. व्यापारीही त्याच्या आमिषाला बळी पडला व आपली मालमत्ता गहाण ठेवून या टोळीला टप्प्याटप्प्याने 66 लाख रुपये दिले होते. आंध्र प्रदेशमध्येही अशाच प्रकारचा अपहाराचा गुन्हा दाखल झाला असून, त्यात फिलीपचा समावेश असल्याचे धागेदोरे तपास करणाऱ्या सीआयडी पोलिसांच्या हाती लागले. त्यामुळे त्याला कारागृहामधून ताब्यात घेण्यासाठी आंध्रच्या सीआयडी पोलिसांनी न्यायालयात शनिवारी (ता. 21) अर्ज सादर केला.