बल्लारपूर (जि. चंद्रपूर) : कोरोनामुळे टाळेबंदीत शांतता असताना शहराला हादरवून टाकणारी घटना मंगळवारी (ता. 28) येथे घडली. वडिलांनी स्वत:च्या दोन्ही मुलांवर गोळ्या झाडल्या. त्यानंतर स्वत:लाच गोळी मारून आत्महत्या केली. ही घटना येथील भगतसिंग वॉर्डात सायंकाळी पाच वाजताच्या सुमाराला घडली. यात एका मुलाचा मृत्यू झाला. दुसरा गंभीर जखमी असून, त्याची प्रकृती चिंताजनक आहे. त्याला उपचारासाठी नागपूरला हलविण्यात आले आहे. कुटुंबातील आपसी वादातून हे हत्याकांड घडल्याचा अंदाज आहे.

शहरातील भगतसिंग वॉर्डात राहणारे मुलचंद द्विवेदी (वय 50) यांनी त्यांचा मुलगा आकाश द्विवेदी (वय 22) आणि पवन द्विवेदी (वय 20) यांच्यावर गोळीबार केला. या घटनेत वडील मुलंचंद द्विवेदी यांनी आधी आकाशच्या छातीत गोळ्या झाडल्या. तो जागीच ठार झाला. शेजारीच उभ्या असलेल्या पवनवरही बेछूट गोळीबार केला. त्यानंतर स्वत:वर गोळी झाडून आत्महत्या केली. पवन गंभीररित्या जखमी आहे. त्याची प्रकृती चिंताजनक आहे. त्याला उपचारासाठी नागपूरला हलविण्यात आले आहे.

- तू खुद को पुलिस समज रहा है क्‍या? असं म्हणत घातला वाद अन्‌...

एकाचा मृत्यू, दुसरा गंभीर जखमी
या गोळीबाराचा आवाज ऐकून द्विवेदी कुटुबांतील मुलचंद यांचा पुतण्या कुलपदी द्विवेदी याने घराकडे धाव घेतली. त्यावेळी गोळीबार सुरूच होता. कुलदीपच्या अगदी जवळून एक गोळी गेली. त्यात तो थोडक्‍यात बचावला. हल्लेखोर मुलचंद द्विवेदी भाजपचे बल्लारपूर अध्यक्ष आणि पालिकेचे विद्यमान स्वीकृत सदस्य शिवाचंद द्विवेदी यांचा भाऊ आहे. घटनेची माहिती मिळताच अनेकांनी भगतसिंग वॉर्डाकडे धाव घेतली. पोलिसही घटनास्थळी पोहोचले. वृत्त लिहीस्तोवर पंचनामा सुरू होता. हल्ल्यामागचे नेमके कारण अद्याप समोर आले नाही. मात्र कौटुंबिक वादातून हत्याकांड घडले असावे, अशी चर्चा आहे.