नागपूर : पंढरपूरला मराठा आरक्षणाच्या मागणीमुळे हिंसा होण्याची शक्‍यता असल्याने महापूजा न करण्याची मुख्यमंत्री देवेंद्र फडणवीस यांची कृती निषेधार्ह असल्याचे ट्‌विट प्रदेश कॉंग्रेसचे उपाध्यक्ष व माजी खासदार नाना पटोले यांनी केले. दरवर्षी आषाढी एकादशीला महापूजेचा मान मुख्यमंत्र्यांना मिळतो. दरवर्षी मुख्यमंत्री सपत्निक महापूजा करतात. यंदा मराठा आरक्षणासाठी मागणी करणाऱ्या आंदोलकांनी मुख्यमंत्र्यांना पूजा करू न देण्याचा इशारा दिला होता. यावरून पंढरपुरात चेंगराचेंगरी तसेच सुरक्षेचा प्रश्‍न निर्माण होऊ शकतो, अशी भीती असल्याने मुख्यमंत्री देवेंद्र फडणवीस यांनी महापूजा न करण्याचा निर्णय घेतला. या निर्णयावर कॉंग्रेसचे ज्येष्ठ नेते नाना पटोले यांनी टीका केली. यासंदर्भात ट्‌विट करून नाना पटोले म्हणाले की, गेल्या अनेक वर्षांपासून लाखो लोक पंढरपुरात येतात. तेथे कधीही चेंगराचेंगरी झाली नाही. मराठा आरक्षणासाठी राज्यभरात शांततेत आंदोलन पार पडले. या शांती मोर्चाची देशभरातच नव्हे, तर जगातील प्रसारमाध्यांमध्ये प्रशंसा झाली. ही वस्तुस्थिती असताना मराठा आरक्षणासाठी आंदोलन करणारे हिंसा करतील, अशी भीती दाखविणे हे चुकीचे तसेच निषेधार्ह असल्याचे पटोले यांनी म्हटले आहे.