नागपूर : गोरेवाडा आंतरराष्ट्रीय प्राणिसंग्रहालयांतर्गत सुरू असलेल्या विविध विकासकामांना गती देण्यासोबतच पहिल्या टप्प्यातील कामे येत्या 15 ऑगस्टपूर्वी पूर्ण करण्याचे निर्देश वन राज्यमंत्री डॉ. परिणय फुके यांनी आज वनाधिकाऱ्यांना दिले.
गोरेवाडा आंतरराष्ट्रीय प्राणिसंग्रहालयाचा संपूर्ण आराखडा 451 कोटी रुपयांचा असून त्यापैकी पहिल्या टप्प्यात 50 कोटी रुपये खर्चाची कामे प्राधान्याने पूर्ण करण्याचे निर्देश यावेळी त्यांनी दिलेत. वनभवनात आंतरराष्ट्रीय प्राणिसंग्रहालय तसेच अंबाझरी जैवविविधता उद्यान निर्मितीच्या कामांचा आढावा डॉ. फुके यांनी घेतला. यावेळी प्रधान मुख्य वनसंरक्षक (वनबल प्रमुख) यू. के. अग्रवाल, वनविकास महामंडळाचे व्यवस्थापकीय संचालक डॉ. रामबाबू, गोरेवाडा प्राणिसंग्रहालयाचे विभागीय व्यवस्थापक नंदकिशोर काळे, अतिरिक्त प्रधान मुख्य वनसंरक्षक एस. एच. हुडा, मुख्य वनसंरक्षक कल्याणकुमार, एस्सेलवर्ल्डचे त्यागी होते.
गोरेवाडा आंतरराष्ट्रीय प्राणिसंग्रहालयाची निर्मिती वनविकास महामंडळ, गोरेवाडा प्राणिसंग्रहालय प्रा. लि. तसेच एस्सेलवर्ल्ड सहा वर्षांत टप्प्याटप्प्याने विकसित करण्यात येणार आहे. संपूर्ण आराखडा 451 कोटी रुपयांचा असून पर्यटकांसाठी बिबट सफारी, इंडियन (अस्वल) सफारी तसेच निसर्ग व वन्यप्राणी सफारी सुरू करण्यात येणार आहे. सफारीची सुविधा सुमारे 125 हेक्‍टर क्षेत्रात राहणार आहे. आंतरराष्ट्रीय प्राणिसंग्रहालय मध्य भारतासह देशातील प्रमुख केंद्र म्हणून विकसित करण्यासाठी शासनाने कालबद्ध कार्यक्रम तयार केला आहे.