बेनोडा शहीद (जि. अमरावती) : सततची नापिकी, डोक्‍यावर कर्जाचा डोंगर, मुलाचे शिक्षण, कुटुंबाच्या उदरनिर्वाहाचा प्रश्‍न असह्य झाल्याने शेतकऱ्याने कंटाळून घरात गळफास घेऊन आत्महत्या केली. ही घटना रविवारी (ता. 29) सकाळी बेनोडा शहीद येथे घडली.
विनोद किसनराव चढोकर (वय 40, रा. बेनोडा शहीद), असे गळफास घेऊन आत्महत्या केलेल्या शेतकऱ्याचे नाव आहे.
विनोद चढोकर यांच्याकडे एकत्र कुटुंबाची बेनोडा शहीद येथे चार एकर शेती आहे. शेतीत सतत तीन वर्षांपासून नापिकी होत होती. यावर्षी पाऊस समाधानकारक पडला. त्यामुळे कपाशी, तुरीचे पीक बऱ्यापैकी होते. मात्र खते, फवारणीकरिता पैसे नसल्याने हातचे आलेले पीक जाण्याच्या स्थिती असल्याच्या विवंचनेत शेतकरी विनोद चढोकर यांनी रविवारी (ता. 29) सकाळी आपल्या राहत्या घरातच गळफास घेऊन आत्महत्या केली.
विनोद चढोकर यांच्या शेतीवर सेंट्रल बॅंक ऑफ इंडियाचे पन्नास हजार रुपये कर्ज आहे. त्याच बरोबर लहान भावाच्या आजारपणात लाखो रुपये खर्च करून त्याला वाचविता आले नाही. त्यामुळे उसनवारीत घेतलेली रक्कम परत कशी करायची, या विवंचनेत सापडलेल्या विनोद चढोकर यांनी आत्महत्या केल्याची माहिती नातेवाइकांनी दिली. विनोद यांच्या पश्‍चात पत्नी, दोन मुले, म्हातारे आईवडील असा परिवार आहे.