अकोला :  तोष्‍णीवाल ले-आउट येथील ललीत काळपांडे यांच्या ललीत ट्युटोरियल या शिकवणी वर्गाच्या इमारतीचे अनधिकृत बांधकाम बुधवारी महानगपालिकेतर्फे पाडण्यास सुरुवात करण्यात आली. येथे पार्किंगच्या जागेवर क्लास रूम बांधलेली आढळून आली तर मंजूर नकशापेक्षा 600 चौरस मीटर जास्तीचे बांधकाम आढळल्याने महानगरपालिकेतर्फे ही कारवाई करण्यात आली. यापूर्वी मंगळवारी सहा अनधिकृत इमारतींचे बांधकाम पाडण्यास सुरुवात करण्यात आली होती. या इमारती पाडण्याचे काम बुधवारीही सुरू होते.

मनपा आयुक्‍त संजय कापडणीस यांनी पूर्व झोनमधील ट्युशन क्‍लासेसच्‍या बांधकामांची पाहणी बुधवारी केली. यामध्‍ये तोष्‍णीवाल ले-आउट येथील ललीत काळपांडे यांच्या ललीत ट्युटोरियलचाही समावेश होता. येथे मंजूर नकाशा प्रमाणे 500 चौरस मीटर बांधकाम हवे होते. प्रत्‍यक्षात 1100 चौरस मीटर बांधकाम करण्यात आल्याचे आढळून आले. या इमारतीत 600 चौरसमीटर बांधकाम अधिक करण्यात आले. याशिवाय मंजूर नकाशाप्रमाणे पार्कींगसाठी हवे असलेल्या जागेवर क्‍लासरूम बांधण्यात आली असल्याचे आढळले. उत्‍तरे कडील समास अंतरामध्‍ये ३ मीटर जागा सोडणे आवश्‍यक असताना काहीही जागा सोडली नाही. शिकवणी वर्गासारख्या इमारतीमध्ये सुरक्षेचे सर्व नियम पाळणे आवश्‍यक असताना इमारतीच्या बांधकामातच नियम धाब्यावर बसविण्यात आल्याने विद्यार्थ्यांच्या जीवाशी खेळ सुरू असल्याचा हा प्रकार आहे. त्यामुळे येथील अनधिकृत बांधकाम पाडण्यास सुरुवात करण्यात आली. इमारत मालकाने स्वतःहून या इमारतीचा उर्वरित अनधिकृत भाग पाडावा यासाठी २४ तासांची मुदतही मनपा प्रशासनाकडून देण्यात आली.

ललित काळबांडे यांना एक लाखाचा दंड
ललीत ट्युटोरियलच्या अनधिकृत बांधकाम प्रकरणात क्लासचे संचालक ललित काळबांडे यांना एक लाखाचा दंड करण्यात आला. याशिवाय गीतानगर येथील सरोज अग्रवाल, दत्‍त कॉलनीतील सुनील हातेकर, अंकीत अग्रवाल यांना प्रत्येकी एक लाख तर नंदलाल आलिमचंदानी यांना 50 हजार रुपये असे एकूण 4 लक्ष 50 हजार रुपयांचा दंड मनपातर्फे आकारण्यात आला.

आयुक्तांकडून कारवाईची पाहणी
महानगरपालिका आयुक्त संजय कापडणीस यांनी शहरातील अनधिकृत इमारतीविरुद्ध सुरू असलेल्या कारवाईची पाहणी केली. काही इमारतींना त्यांनी स्वतः भेटी दिल्यात. विशेषतः शहरातील शिकवणी वर्गाच्या टोलेजंग इमारतींची त्यांनी पाहणी केली. त्यामुळे या शिकवणी वर्गाच्या इमारती मनपाच्या रडारवर आल्या आहेत.

बांधकाम व्यावसायिकांची मनपा धाव
अनधिकृत इमारतीविरुद्ध महानगरपालिकेने मंगळवारपासून कारवाई सुरू केली. त्यामुळे बांधकाम व्यावसायिकांचे धाबे दणाणले आहेत. त्यांनी थेट महानगरपालिकेत धाव घेवून अधिकाऱ्यांच्या व पदाधिकाऱ्यांच्या गाठीभेटी सुरू केल्या आहेत.