नागपूर : जिल्हा परिषदेला विद्यार्थ्यांच्या गणवेशाकरिता दिलेला निधी परत गेल्याचा मुद्दा विधिमंडळात गाजणार आहे. सर्वांना गणवेश उपलब्ध करून देणे क्रमप्राप्त असताना दिरंगाईमुळे अनेकांना ते देण्यात आले नसल्याने 24 लाखांचा निधी परत गेला आहे. 17 जूनपासून पावसाळी अधिवेशन सुरू होणार असून हा मुद्दा विधान परिषद सदस्य रामदास आंबटकर यांना तारांकित प्रश्‍नाच्या माध्यमातून मांडला आहे.
जिल्हा परिषदेच्या 1,534 शाळा आहेत. यात जवळपास 70 हजार विद्यार्थी शिक्षण घेत आहेत. मात्र, गेल्या काही वर्षांपासून जिल्हा परिषदेतील शाळांची पटसंख्या कमी होत आहे. अनेक प्रयत्न करूनही विद्यार्थी संख्येत वाढ होताना दिसत नाही. सर्व शिक्षा अभियानाच्या माध्यमातून जिल्हा परिषदेला विद्यार्थ्यांच्या गणवेशासाठी वर्ष 2018-19 मध्ये 4 कोटी 38 लाखांचा निधी मिळाला होता. यावर्षी शासनाने डीबीटी रद्द करून शाळा व्यवस्थापन समितीमार्फत विद्यार्थ्यांना गणवेश देण्याचा निर्णय घेतला होता. प्रत्येक पात्र विद्यार्थ्यास गणवेश मिळणे आवश्‍यक होते. मात्र, काही विद्यार्थ्यांना गणवेशच मिळाला नाही व गणवेशाचा 24 लाखांचा निधी शासनाकडे परत गेला.