नागपूर  : संवेदनशीलसोबत कमी मतदान होत असलेल्या मतदान केंद्रांवर विशेष लक्ष ठेवण्यात येणार आहे. या मतदान केंद्राच्या हालचालींवर वेब कास्टिंगच्या माध्यमातून थेट जिल्हाधिकारी कार्यालयासह निवडणूक आयोगाची नजर राहणार आहे. जिल्ह्यात 444 मतदान केंद्रांवरून वेब कास्टिंग करण्यात येणार आहे. विधानसभा निवडणुकीची रणधुमाळी सुरू झाली आहे. राजकीय पक्ष व उमेदवार प्रचाराला लागले आहेत. दुसरीकडे प्रशासनाची तयारी जोरात सुरू आहे. मतदानासाठी प्रशासनाकडून आवश्‍यक तयारी करण्यात आली आहे. काही निवडणुकीचा अनुभव लक्षात घेता संवेदनशील तसेच कमी मतदान होत असलेल्या केंद्रांची यादी तयार करण्यात आली आहे. या भागात मतदानाची टक्केवारी वाढविण्यासाठी जनजागृती करण्यात येणार आहे. येथे कोणत्याही प्रकारची अनुचित घटना होता कामा नये यासाठी वेब कास्टिंगच्या माध्यमातून प्रत्येक हालचालींवर लक्ष ठेवण्यात येणार आहे.जिल्ह्यात 12 विधानसभा मतदारसंघ असून, 4,412 मतदान केंद्र निश्‍चित केले आहेत. यातील 444 मतदान केंद्रांवरील हालचालींवर वेब कास्टिंगच्या माध्यमातून नजर ठेवण्यात येणार आहे. याचे थेट प्रक्षेपण जिल्हाधिकारी कार्यालयात होणार आहे. त्याचप्रमाणे याची लिंग निवडणूक आयोगाकडे असणार असल्याची माहिती आहे.