पोरज (जि.बुलडाणा) : खर्चाच्या तुलनेत केळीला नाममात्र भाव मिळत असल्याने शेतकरी संकटात सापडला आहे. केळी पिकाला एकरी 50 ते 60 हजार रुपये खर्च लागतो. एवढा खर्च लागूनही दरवर्षी एकरी 100 ते 150 क्विंटल मिळणारे उत्पन्न यावर्षी 70 ते 80 क्विंटलवर येऊन ठेपले आहे. गारपिटीमुळे शेतकऱ्यांचे मोठे नुकसान झाले असून, त्यातच मागील तीन आठवड्यापासून कोरोना व्हायरसचे जगावर उद्भवलेल्या संकटामुळे महाराष्ट्रात लॉकडाउन आहे. त्यामुळे केळीची कटनच रोखली आहे.

खामगाव तालुक्यातील पोरज, वर्णा, दिवठाणा, काळेगाव, निमकवळा या गावात गत दोन दशकापासून मोठ्या प्रमाणात केळीचे पीक घेतले जाते. यासाठी खान्देशात विकसित करण्यात आलेल्या नव्या जातीच्या बेण्याची लागवड केली जाते. यातूनच परिसरातील अनेक केळी उत्पादकांनी आता जी-9 हे टिश्‍युकल्चरच्या बेणे लावले आहे. 16 रुपयांत हे प्रत्येकी एक बेणे खरेदी केले जाते. परिसरातील 35 ते 40 शेतकऱ्यांनी यालाच पसंती दर्शवली.

महत्त्वाची बातमी - बुलडाणेकरांना गुड न्यूज; तीन पॉझिटिव्ह रुग्ण कोरोनामुक्त

जवळपास दोन लाख बेणे लावले आहे. या बेण्याच्या खर्चासाठी प्रत्येकी 32 रुपये बेणे प्रमाणे खर्च शेतकऱ्यांना वाहतूक लागवड करतानाच करावा लागतो. गारपीटमुळे अत्यंत उत्पन्न कमी व त्यालाही भाव नाही. त्यामुळे शेतकरी चिंतातूर झाला आहे. अत्यंत बिकट परिस्थितीत शेतकऱ्यांनी केळी जगवली. त्यात आता तिलाही 100 रुपये क्विंटल भाव मिळत आहे.

आवश्‍यक वाचा - बाळा मी लवकरच येईल...

माल न विकल्यास सडून जाण्याची भीती
मी अल्पभूधारक शेतकरी असून, अडीच एकरामध्ये केळी लागवड केली आहे. या व्यापाऱ्यांशी संपर्क केला असता लॉकडाउनचे कारण व्यापारी दाखवून 100 ते 150 रुपये प्रतिक्विंटल प्रमाणे मागणी करत असल्याने व खर्चही निघत नाही. तर तीन ते चार दिवसांमध्ये माल न विकल्यास सडून जाण्याची तेवढीच भीती आहे.
- शिवाजीसिंह बोराडे, केळी उत्पादक शेतकरी, पोरज