नागपूर - गारपीट व अवकाळी पावसामुळे जिल्ह्यात २० हजार ३१८ शेतकऱ्यांच्या १६ हजार ३५१.६२ हेक्‍टर क्षेत्रातील पिकांचे नुकसान झाल्याची माहिती जिल्हाधिकारी सचिन कुर्वे यांनी दिली. 

यात संत्रा, मोसंबी, केळी आदी फळे तसेच गहू, हरभरा व भाजीपाला आदी पिकांचे मोठ्या प्रमाणात नुकसान झाले असून, जिल्हा प्रशासनातर्फे बाधित क्षेत्रातील नुकसानाचे सर्वेक्षण केवळ चार दिवसांत पूर्ण करून अहवाल शासनाला सादर करण्यात आल्याचेही कुर्वे यांनी सांगितले. जिल्ह्यात वादळी पाऊस व गारपिटीमुळे ११ ते १३ फेब्रुवारीदरम्यान शेती व फळ पिकांचे नुकसान झाले.

या नुकसानासंदर्भातील सर्वेक्षण करण्यात आले. यात कळमेश्वर, सावनेर, काटोल, नरखेड, पारशिवनी व रामटेक तालुक्‍यातील गहू, हरभरा व भाजीपाला पिकांचे नुकसान झाले. तर काटोल, नरखेड, सावनेर, कळमेश्वर व पारशिवनी आदी तालुक्‍यात संत्रा, मोसंबी, केळी व इतर पिकांची हानी झाली. 

बाधित शेतकऱ्यांना झालेल्या नुकसानभरपाईसाठी २४ कोटी ८५ लाख रुपये निधी लागणार आहे. कोरडवाहू क्षेत्रातील १५९.६९ हेक्‍टर, सिंचित क्षेत्रातील ९ हजार ७५१.११ हेक्‍टर तसेच बहुवार्षिक पिकाखाली क्षेत्रातील ६ हजार ४३०.८२ हेक्‍टर अशा एकूण १६ हजार ३५१.६२ हेक्‍टर क्षेत्रांमध्ये पिकांचे नुकसान झाले.