नागपूर - मॅग्नेटिक महाराष्ट्र कन्व्हर्जन्स प्रदर्शनात विविध ऊर्जा कंपन्यांसोबत ऊर्जा विभागाने एक लाख ६० हजार २६८ कोटींचे सामंजस्य करार केले आहेत. यात नागपूरमध्ये शंभर मेगावॉटचा तरंगता सौरऊर्जा प्रकल्प उभारण्यात येणार आहे. यातून नागपूरमध्ये तब्बल एकवीसशे कोटी रुपयांची गुंतवणूक होणार आहे. 

महाराष्ट्राच्या औद्योगिक विकासासाठी ‘मॅग्नेटिक महाराष्ट्र कन्व्हर्जन्स’ मुंबईत आयोजित करण्यात आले आहेत. आज ऊर्जाविभागाशी संबंधित वेगवेगळे करार झाले. या करारामुळे २०२४ पर्यंत सुमारे ३० हजार तरुणांसाठी रोजगारनिर्मिती होईल, अशी आशा राज्याचे ऊर्जामंत्री चंद्रेशखर बावनकुळे यांनी व्यक्त केली. 

येथे नागपूर जिल्ह्यातील उमरेड तालुक्‍यात ८०० मेगावॉट औष्णिक निर्मितीसाठी ५,२०० कोटी रुपये गुंतवणुकीकरिता सामंजस्य करार केला. महावितरणने विविध प्रकल्पांच्या विकासासाठी २०० मेगावॉट सौरऊर्जानिर्मिती १,८०० कोटी रुपयांचा सामंजस्य करार केला. तर महापारेषणने वीज उपकेंद्रे, पारेषण वाहिन्या, देखभाल दुरुस्तीचे प्रकल्प म्हणून ८,००० कोटी रुपयांची गुंतवणूक करण्याची तयारी दर्शविली आहे. नागपूर आणि मुंबईत गिरीराज रिनिवेबल प्रा. लि. तरंगता सौरऊर्जा प्रकल्प विकसित करणार आहे. महानिर्मितीने पारंपरिक व अपारंपरिक ऊर्जानिर्मिती, जुन्या ऊर्जानिर्मिती संचाची दुरुस्ती, कोळसा खाणी विकास आदींसाठी १३ हजार कोटींची गुंतवणूक करण्याची तयारी दर्शविली आहे.