नागपूर : मेडिकलच्या अधिष्ठाता कार्यालयासमोरचा परिसर. शंभरापेक्षा अधिक विद्यार्थी एकाच ठिकाणी गोळा झाले. येता-जाता सारे वैद्यकीय शिक्षक विचारत होते, काय झाले? साऱ्या मुलांचे एकच उत्तर सिनियर भाऊ लोकं मार्गदर्शन करणार आहेत. अधिष्ठाता कार्यालयासमोर कोणते मार्गदर्शन करणार हे विचारताच विद्यार्थ्यांच्या चेहऱ्यावरचे भाव बदलले. सारे तोंडावर बोट हाताची घडी करून हळूच निघून गेले.
एमबीबीएसच्या पहिल्या वर्षाला शिकणारे शंभरावर विद्यार्थी एकाच ठिकाणी गोळा झाले. साऱ्यांच्या चेहऱ्यावरचे भाव वेगवेगळे. अधिष्ठाता कार्यालयासमोर का? निवेदन देणार का? अशी विचारणा करताच सारे विद्यार्थी भांबावले. डिसेंबरमध्ये परीक्षा असल्यामुळे एमबीबीएसचे वरिष्ठ भाऊ लोकं मार्गदर्शन करणार आहेत. सहाय्यक प्राध्यापक, सहयोगी प्राध्यापक, प्राध्यापक मार्गदर्शन करायचे सोडून वरिष्ठ विद्यार्थी कोणत्या आधारे मार्गदर्शन करणार असा सवाल करताच विद्यार्थ्यांनी पाय काढता घेतला.

हळूहळू सारेच गूल
दहा मिनिटं येथेच थांबल्यानंतर मात्र एमबीबीएसच्या प्रथम वर्षाचे एकत्र जमलेले सारे विद्यार्थी हळूहळू येथून वसतिगृहाच्या दिशेने चालू लागले. भाऊ लोकं येणार नाही, असे सांगत सारेच विद्यार्थी पंधरा मिनिटांनंतर गूल झाल्याचे दिसून आले. यासंदर्भात प्रशासनाला विचारणा केली असता, त्यांनीही रॅगिंग नसल्याचे सांगितले.