नागपूर : भांडण सोडविण्यासाठी गेलेल्या इसमाचा चाकूने भोसकून खून करणाऱ्या पिता-पुत्रांसह तीन आरोपींना जिल्हा न्यायालयाने जन्मठेप व पाच हजार रुपये दंडाची शिक्षा सुनावली. रामू ऊर्फ चुन्नी मुन्ना महतो (२६), चेतन मुन्ना महतो (२४) अशी आरोपी मुलांची व मुन्ना मोहन महतो (५०, सर्व रा. सुदर्शन मंदिराजवळ, ट्रस्ट लेआऊट, पांढराबोडी) असे शिक्षा झालेल्या आरोपी वडिलाचे नाव आहे.

खुनाची घटना ४ ऑक्टोबर २०२० रोजी घडली. आरोपींनी रात्री दहा वाजताच्या सुमारास दिनेश संताराम नहरकर (३३, रा. पांढराबोडी) यांच्या घरासमोर येत त्यांच्या पुतण्याला शिवीगाळ केली. तसेच मारहाणही केली. भांडण वाढू नये म्हणून कुटुंबातील इतर सदस्यांनी त्यांना घरात नेले. मात्र, अंगात शैतान संचारल्याप्रमाणे रामू,चेतन हे दोघे भाऊ आणि वडील मुन्ना यांनी नहरकर यांच्या घराचा दरवाजा तोडून जबरदस्तीने आत घुसले आणि भांडण करू लागले.

दिनेश संताराम नहरकर यांनी तिघांविरोधात अंबाझरी पोलिस ठाण्यात तक्रार दिल्यानंतर खुनाचा गुन्हा दाखल झाला. न्यायालयाने साक्ष-पुरावा लक्षात घेता तीनही आरोपींना दोषी ठरविले. न्यायाधीश एम. एस. आजमी यांनी निर्णय देताना तिघांनाही जन्मठेपेची शिक्षा सुनावली. शासनातर्फे आनंद ठाकरे यांनी बाजू मांडली. तर, आरोपीतर्फे ॲड. अजय भंडारे यांनी कामकाज पाहिले.

दोघांनी पकडून ठेवत चाकूने वार

दिनेश यांचे मोठे बंधू अशोक संताराम नहरकर (४०) यांनी आरोपींना थांबविण्याचा प्रयत्न केला असता मुन्ना आणि चेतन या बापलेकांनी अशोक यांना पकडून ठेवले. असहाय्य झालेल्या अशोक यांच्यावर राम ऊर्फ चुन्नी याने चाकूने हात, छाती आणि पोटावर सपासप वार केले. यात गंभीर जखमी झालेले अशोक यांचा मृत्यू झाला.