मेंढला (जि.नागपूर) :  सततची नापिकी व यावर्षी झालेला अतिपाऊस, त्यातून कुटुंबाचा उदरनिर्वाह कसा करायचा, बॅंकेचे पैसे परत कसे करायचे, या विचाराने चिंताग्रस्त झालेल्या मेंढला येथील एका युवा शेतकऱ्याने विहिरीत उडी घेऊन आत्महत्या केल्याची घटना शनिवारी घडली.

क्‍लिक करा  :  महादेवाचे दर्शन घेतल्यानंतर त्यांनी घेतली रेल्वेतून उडी, काय झाले असावे?

बॅंकेच्या कर्जाची परतफेड करणे झाले कठीण
मृत शेतकऱ्याचे नाव अतुल लाडे (मेंढला, ता. नरखेड) असे आहे. अतुल हा घरचा कर्ता पुरुष होता. वडील मरण पावले तेव्हापासून त्याने अडीच एकर जमिनीचा सांभाळ केला होता. डोक्‍यावर असलेला कर्जाचा डोंगर, उसणवारी पैशाची काळजी व यावर्षी पीकसुद्धा चांगले झाले नाही, या विचाराने तो त्रस्त होता. आपण घेतलेले पैसे परत कसे करायचे, या काळजीत त्याची प्रकृती ढासळत गेली. घरी पैसा नसल्यामुळे घरातील सदस्यांचा उदरनिर्वाह कसा करायचा, या विवंचनेत असलेल्या अतुलने शनिवारी दुपारी चारच्या सुमारास घरासमोरील विहिरीत उडी घेऊन आत्महत्या केली.

क्‍लिक करा  :   VIDEO  :  बॉक्‍सर मुलाच्या अंत्ययात्रेत वडिलांनी वाजवला "डिजे', हे आहे कारण...

आई, तू कार्यक्रमाला जा !
गावांमध्ये वाडी दर्गा येथे कार्यक्रम होता. ग्रामस्थ त्या कार्यक्रमामध्ये गेल्याचे पाहून व आपण कोणाला असा प्रकार करताना दिसायला नको, म्हणून त्याने काळजी घेतली. दुपारी बाराला जलालखेडा येथून आल्यावर त्याची आई आणि त्याने सोबत जेवण केले. त्यानेच आईला कार्यक्रमात जा, असे सांगितले. आई घरून कार्यक्रमाला निघून गेली. रात्री आई घरी परत आल्यावर मोबाईल, दुचाकी, त्याचे जोडे या वस्तू घरीच पडून दिसल्यामुळे आईने तो कुठे गेल्याची चौकशी केली. शेती जंगलाला लागून असल्याने जागल करण्यासाठीसुद्धा तो जात होता. काही घराजवळील लोक दुचाकी घेऊन शेतात त्याला शोधण्यासाठी गेले. तिथेही तो आढळला नाही. घरच्या विहिरीमध्ये टॉर्च लावून पाहिले असता, शेजाऱ्यांना विहिरीमध्ये त्याचा मृतदेह आढळला. जलालखेडा पोलिस ठाण्याला ही माहिती देण्यात आली. पोलिसांनी विहिरीतून मृतदेह काढून उत्तरीय तपासणीसाठी पाठविला. पुढील तपास जलालखेडा पोलिस ठाण्याचे निरीक्षक दीपक डेकाटे यांच्या मार्गदर्शनाखाली बिट जमादार संजय इंगोले व शरद घोरमाडे करीत आहेत.