नागपूर : महाराष्ट्र सध्या बलात्कार, खून अशा घटनांमुळे हादरला आहे. असे असताना वाशीम जिल्ह्यातील अनसिंगमधून एक अनोखा प्रसंग पुढे आला आहे. खुनाच्या प्रयत्नात नागपूर खंडपीठाने दहा वर्षांची शिक्षा ठोठावलेल्या आरोपीला सर्वोच्च न्यायालयाने दया दाखवत शिक्षा कमी केली. ही शिक्षा कमी व्हावी म्हणून चक्क घटनेत जखमी झालेल्या इसमाने सर्वोच्च न्यायालयाला विनंती केली.

जखमी झालेले चिंतामण डांगे आणि आरोपी सय्यद अझहर सय्यद अझहर यांच्यात बेकायदेशीर बांधकामावरून २०१६ साली वाद झाला होता. याचा वचपा काढण्यासाठी ११ मे २०१६ रोजी अनसिंगशहरात निघालेल्या संदल मिरवणुकीत चिंतामण डांगे यांच्यावर अझहरने दोन साथीदारांसह मिळून हल्ला केला. जखमी अवस्थेत फिर्यादीचे नातेवाईक गजानन कुटे यांनी त्यांना रुग्णालयामध्ये दाखल केले आणि आरोपीविरोधात अनसिंग पोलिस ठाण्यामध्ये तक्रार दाखल केली.

पोलिसांनी घटनेची चौकशी करून कनिष्ठ न्यायालयामध्ये दोषारोपपत्र दाखल केले. न्यायालयाने दहा वर्षे सश्रम कारावास आणि दहा हजारांची शिक्षा ठोठावली. नागपूर खंडपीठानेसुद्धा ४ जानेवारी २०१९ रोजी निकाल देत ही शिक्षा कायम ठेवली. आरोपीने या विरोधात सर्वोच्च न्यायालयात धाव घेत फौजदारी अर्ज दाखल केला. या प्रकरणावर न्यायमूर्ती अजय रस्तोगी आणि न्यायमूर्ती अभय ओक यांच्या समक्ष सुनावणी झाली. न्यायालयाने दहा वर्षांच्या शिक्षेमध्ये कपात करीत पाच वर्षांच्या सश्रम कारावासामध्ये ती शिक्षा रूपांतरित केली. तसेच दहा हजार रुपये दंड ठोठावला.

डांगे यांनी केली शिक्षा कमी करण्याची विनंती

प्रकरण सर्वोच्च न्यायालयामध्ये प्रलंबित असताना हल्यामध्ये जखमी झालेले चितांमण डांगे यांच्या पत्नी आणि आरोपीने संयुक्त शपथपत्र दाखल केले. शपथपत्रानुसार, आम्ही एकाच परिसरामध्ये राहत असून कुटुंबातील वाद मिटला आहे. ही घटना एका गैरसमजामुळे अनपेक्षितपणे घडली. आता आम्ही शांततेने परिसरामध्ये राहतो आहे. तर चितांमण डांगे यांनीसुद्धा सकारात्मकतेने उत्तर देत आरोपीचे वय बघता त्याला माफ करण्याची विनंती सर्वोच्च न्यायालयाला केली.