नागपूर - श्री गुरुदेव सेवा मंडळाचे निष्ठावंत कार्यकर्ते व राष्ट्रसंतनगर, झिंगाबाई टाकळी येथील रहिवासी सुरेश कोळमकर यांचे हृदयविकाराने निधन झाले. नियतीने डोक्यावरून वडिलांचे छत्र हिरावून नेल्यानंतर मुलाने हृदयावर दगड ठेवत वडिलांचे नेत्रदान करून गरजू व्यक्तीला नवी दृष्टी प्रदान केली.

मनमिळाऊ स्वभावाचे सुरेश कोळमकर यांचे वयाच्या ६५ व्या वर्षी निधन झाले. निधनानंतर मुलगा आदर्श व पत्नी रेवती सुरेश कोळमकर यांनी स्वत:चे दु:ख बाजूला सारत वडिलांचे नेत्रदान करुन समाजापुढे आदर्श ठेवला. समाजात असंख्य व्यक्ती आहेत, जे डोळ्यांअभावी हे सुंदर जग पाहू शकत नाहीत.

अशाच एका व्यक्तीच्या आयुष्यात उजेड पडावा, या उद्देशाने मुलगा व पत्नीने आभाळाएवढं दुःख विसरून व मोठे मन करून हा अवघड निर्णय घेतला. वंदनीय राष्ट्रसंत तुकडोजी महाराजांच्या विचाराने प्रेरित मुलाने वडिलांच्या अस्थी भारतातील ३५ नद्यांचे पाणी आणि १५ संतांच्या अस्थी असलेल्या गुरुकुंज मोझरी येथील तीर्थकुंडात समर्पित केल्या आल्या.

यावेळी गुरुदेव सेवा मंडळाचे जेष्ठ प्रचारक आचार्य वेरुळकर गुरुजी व ग्रामगीता प्रचारक कीर्तनकार मनोज महाराज चौबे, मोहनदास चोरे व अन्य मान्यवरांच्या उपस्थितीत त्यांना श्रद्धांजली वाहण्यात आली.