चंद्रपूर : दारूची अवैध वाहतूक करणार्‍या तस्कराने आज (मंगळवार) पहाटे पोलिसाला चिरडले. या घटनेत गंभीर जखमी झालेल्या पोलिसाचा उपचारादरम्यान रुग्णालयात मृत्यू झाला.

छत्रपती चिडे असं या पोलिसाचं नाव असून, ते नागभीड पोलीस ठाण्यात कार्यरत होते.

पहाटे चार वाजताच्या सुमारास मौशी चोरगावजवळ पेट्रोलिंग करीत असताना भरधाव आलेल्या वाहनाने त्यांना उडवले. या वाहनात अवैध दारू असल्याची माहिती असल्यानं पोलीस या मार्गावर तैनात होते.

जखमी पोलीस चिडे यांचा ब्रम्हपुरी येथील एका रुग्णालयात उपचारादरम्यान मृत्यू झाला. या घटनेने अवैध दारुविक्रेत्यांची दादागिरी कशी वाढत चालली, हेही दिसून आलं.