नागपूर : विधानसभा निवडणुकांसाठी प्रत्येक विधानसभा मतदारसंघात "महिला व्यवस्थापित मतदान केंद्र' निर्माण करण्यात येईल. शहर व जिल्ह्यात प्रत्येक विधानसभा मतदारसंघात सखी मतदान केंद्र राहणार आहे. या केंद्रांमध्ये पोलिसांपासून ते निवडणूक कार्यावर असलेले अधिकारी आणि कर्मचारी महिला असतील.
लैंगिक समानता आणि मतदार प्रक्रियेत महिलांच्या रचनात्मक सहभागासंबंधातील वचनबद्धतेचा भाग म्हणून महिलांनी चालवलेले महिला मतदान केंद्र असणार असून, याला "सखी मतदान केंद्र' म्हटले जाणार आहे. सर्व महिला व्यवस्थापित मतदान केंद्रात कोणताही विशिष्ट रंग वापरला जाणार नाही, असे निर्देश निवडणूक आयोगाने दिले आहेत. नागपुरात विधानसभेचे सहा मतदारसंघ आहेत. यात दक्षिण-पश्‍चिम, दक्षिण, पूर्व, पश्‍चिम, उत्तर व मध्य याचा समावेश आहे. या सहाही विधानसभा मतदारसंघात स्त्री मतदारांची संख्या 10 लाख 47 हजारांवर आहे.
जिल्ह्याच्या ग्रामीण भागात कामठी, उमरेड, काटोल, हिंगणा, रामटेक व सावनेर या सहा विधानसभा मतदारसंघाचा समावेश आहे. येथे महिला मतदारांची संख्या 9 लाख 13 हजारांवर आहे. प्रत्येक विधानसभा क्षेत्रात एक सखी मतदान केंद्र राहणार आहे. "सखी मतदान केंद्र' अधिकाधिक आकर्षक आणि सुंदर बनविण्यासाठी रांगोळी, रंगरंगोटीसह साफसफाईवर विशेष भर देण्यात येईल. प्रत्येक मतदारसंघातून एकाच मतदान केंद्राची निवड होईल. महिला मतदान केंद्र निवडताना केंद्राची सुरक्षितता लक्षात घेतली जाणार आहे.
महिलांचा सहभाग वाढणार
यंदाच्या निवडणुकीत महिला शक्ती निर्णायक ठरणार आहे. "सखी मतदार केंद्र' स्थापन करण्याच्या निर्णयामुळे महिलांचा मतदानातील सहभाग वाढण्यास मदत होणार असल्याची अपेक्षा व्यक्त करण्यात येत आहे.