नागपूर : पैशाच्या कारणावरून सासऱ्यासोबत झालेल्या वादातून जावई आकाश सिद्धार्थ तागडे (30, रा. गवळीपुरा, गिट्टीखदान) याने गळफास लावून आत्महत्या केली. ही घटना गिट्टीखदानमध्ये उघडकीस आली. 
पोलिसांनी दिलेल्या माहितीनुसार, आकाश हा पेट्रोल टॅंकवर क्‍लीनर होता. त्याचे दीड वर्षापूर्वीच लग्न झाले. तो पत्नीसह गवळीपुऱ्यात राहत होता. काही दिवसांपासून त्याचा सासऱ्यासोबत पैशाच्या कारणावरून वाद सुरू होता. आकाश सोमवारी सायंकाळी वाडी येथे राहणाऱ्या सासऱ्याकडे गेला असता सासऱ्यासोबत वाद झाला. रागाच्या भरात तो रात्री आठ वाजताच्या सुमारास घरी आला. त्याने घरात आल्याबरोबर पत्नीवर आरडाओरड करीत कानशिलात लगावली. "तुझ्या वडिलामुळे अशी वेळ आली' असे वाक्‍य बोलून तो बेडरूममध्ये गेला आणि दार लावून घेतले. काही वेळातच आकाशने पत्नीच्या ओढणीने गळफास लावून आत्महत्या केली. बराच वेळ होऊनही आकाशने दार उघडले नसल्याने त्याच्या वडिलांनी दार ठोठावले. परंतु, प्रतिसाद मिळाला नाही. काहीतरी विपरीत घडल्याचा संशय वडिलांना आला. त्यांनी शेजाऱ्यांच्या मदतीने दार तोडले असता आकाश गळफास घेतलेल्या अवस्थेत दिसला. आकाशला मेयोत नेले असता डॉक्‍टरांनी मृत घोषित केले. गिट्टीखदान पोलिसांनी आकस्मिक मृत्यूची नोंद केली आहे.