गोंदिया : जादूटोण्याच्या संशयावरून एका व्यक्तीवर तीन जणांनी तलवारी व चाकूने हल्ला केला. ही घटना येथील शास्त्री वॉर्ड मंतर चौक येथे मंगळवारी (ता. 26) दुपारी बाराच्या सुमारास घडली. चक्रधर बोरकर (वय 60, रा. गौतमनगर, मामा चौक, गोंदिया) असे जखमीचे नाव आहे. त्यांच्यावर जिल्हा सामान्य रुग्णालयात उपचार सुरू आहेत.

गोंदिया शहर पोलिसांनी याप्रकरणी विनोद योगेंद्रसिंह जुरेल (वय 45, रा. शास्त्री वॉर्ड, गोंदिया), अभिषेक राजेश बडगे (रा. सुंदरनगर, गोंदिया) व महेंद्र रामेश्‍वर भालेराव (रा. सुंदरनगर, गोंदिया) यांना अटक केली. चक्रधर बोरकर मंगळवारी दूध डेअरीजवळ बसून होते. बोरकर ज्या ठिकाणी बसले होते, तिथे पोहोचून आरोपी विनोद जुरेल याने "तू जादूटोणा करतोस' असे म्हणत त्यांच्यासोबत भांडण केले.

असा घडला नागपूरच्या खालस हॉटेलमध्ये हत्येचा थरार... पोलिसांना लावला छडा

त्यानंतर आरोपी महेंद्र भालेराव याने तलवार व बेस बॉल बॅटने मारून बोरकर यांना जखमी केले. दरम्यान, विनोद नेवारे बोरकर यांना वाचविण्यासाठी धावले असता आरोपी विनोद जुरेल याने नेवारे त्यांच्यावर गोळीबार केला. यात तेदेखील जखमी झाल्याची माहिती आहे.

विशेष म्हणजे कोरोना संसर्गाच्या काळात जिल्ह्यात संचारबंदी लागू असताना तलावर घेऊन गोंधळ घालणे व गोळीबारसारख्या घटना पोलिसांच्या कार्यक्षमतेवर प्रश्नचिन्ह निर्माण करणारे आहे. घटनेची माहिती मिळताच शहर पोलिसांनी घटनास्थळी धाव घेत जखमीला रुग्णालयात हलविले.