माजरी (जि. चंद्रपूर) : वणी-वरोरा मार्गावर पाटाळा पोलिस चौकीजवळ वाळूच्या टिप्परने विरुद्ध दिशेने दुचाकीवर येणाऱ्या पोलिस शिपायाला चिरडले. ही घटना सोमवारी सकाळी 11 वाजताच्या सुमाराला घडली. जखमी शिपायाला वरोरा उपजिल्हा रुग्णालयात दाखल केले, मात्र तोपर्यंत त्याचा मृत्यू झाला होता.
सुनील धनलाल बरोले (वय 30) असे मृत पोलिस शिपायाचे नाव आहे. ते जिल्ह्यातील दुर्गापूर येथील रहिवासी होते. माजरी पोलिस ठाण्यात ते सहा महिन्यांपूर्वीच रुजू झाले होते. आज सुनील दुचाकीने वरोरा येथे जायला निघाला. माजरी फाट्याजवळ वणीकडे जात असलेल्या टिप्परने दुचाकीला धडक दिली. नागरिकांनी टिप्पर चालक कैलाश ढवळे याला पकडून पोलिसांच्या स्वाधीन केले. सुनील बरोले 2016 मध्ये पोलिस दलात कार्यरत झाले. सुनीलचे अडीच महिन्यांपूर्वीच लग्न झाले होते.