नागपूर - विविध चाचण्या पूर्ण करीत असलेल्या नागपूर मेट्रोने आज पिलरवरील रुळावरून (एलिवेटेड ट्रॅक) धावण्याचीही चाचणी पूर्ण करीत शहराच्या इतिहासात सुवर्ण अध्याय जोडला. वर्धा मार्गावरील खापरी ते अजनी स्टेशनपर्यंत ट्रॅकवर रिचर्स डिझाईन ऍन्ड स्टॅन्डर्ड ऑर्गनायझेशनच्या (आरडीएसओ) चाचणीत मेट्रोने यश मिळविले. एलिवेटेड ट्रॅकवरून मेट्रो धावताना बघून नागपूरकरही सुखावले. 

वर्धा मार्गावरल खापरी ते सिताबर्डी इंटरचेंज स्टेशन व हिंगणा मार्गावर सुभाषनगर ते लोकमान्यनगर मेट्रो स्टेशनपर्यंत प्रवासी सेवेला सुरुवात करण्यासाठी महामेट्रो प्रशासनाने तयारी सुरू केली आहे. याअंतर्गत काल शुक्रवारपासून आरडीएसओचे पथक विविध चाचण्यांसाठी नागपुरात दाखल झाले. आज या पथकाने मेट्रो रेल्वेचे तीन डब्यांची ट्रॅकवरून धावण्यासंदर्भात चाचणी घेतली. कुणालाही याबाबत माहिती नसल्याने ट्रॅकवरून मेट्रो धावताना नागपूरकरही आश्‍चर्यचकीत झाले. या चाचणीमुळे पुढील महिन्यात पहिल्याच आठवड्यात प्रवासी मेट्रो धावण्याचा मार्ग मोकळा झाला आहे.