यवतमाळ : पाऊस येताच युरिया खताच्या (Urea fertilizer) मागणीत वाढ होण्याची शक्यता आहे. त्यामुळे आतापासून काही ठिकाणी युरियाचा कृत्रिम तुटवडा (Artificial scarcity of urea) तयार केला जात आहे. शेतकऱ्यांच्या मागणीनंतर जादा दराने विक्री केल्याची तोंडी तक्रारही शेतकऱ्यांनी कृषी विभागाकडे केल्यास कृषी केंद्रचालकांना ती भारी पडण्याची शक्यता आहे. (Verbal-complaints-of-farmers-will-be-heavy-on-agricultural-centers)

जिल्ह्यात खरिपाची पेरणी ६० टक्क्यांवर थांबली आहे. पावसामुळे पेरणीचा वेग मंदावला असला तरी आता शेतकऱ्यांनी पेरणीला सुरुवात केली आहे. सध्या पावसाने उसंत घेतल्याने युरियाची मागणी कमी आहे. चांगला पाऊस येताच युरियाच्या मागणीत मोठी वाढ होण्याची शक्यता आहे. सध्यास्थितीत जिल्ह्यात युरियाचा तुटवडा नाही. मूबलक प्रमाणात युरिया असल्याचे कृषी विभागाचे म्हणणे आहे. असे असले तरी आतापासून युरियाचा तुटवडा असल्यासारखी स्थिती तयार केली जात आहे.

तुटवडा दाखवून शेतकऱ्यांना जास्त रक्कमेत युरिया विकण्याची काहींनी शक्कल लढविली आहे. मात्र, ही शक्कल अनेकांना भारी पडण्याची शक्यता आहे. कृषी सेवा केंद्र चालकांना जादा दराने विक्री केल्याची तोंडी तक्रारही अडचणी आणणारी ठरणार आहे. कृषी विभागाकडे तशी तक्रार आल्यास संबंधित कृषी केंद्र चालकावर थेट कारवाई केली जाणार आहे. त्यामुळे युरियाचा काळाबाजार करून ‘लिंकिंग’ करणाऱ्यांना चाप बसण्याची शक्यता आहे. सुरुवातीला पेरणी केलेल्या शेतकऱ्यांना आता खतांची गरज आहे. बाजारात खतांचा तुटवडा नसला तरी जादा दराने विक्री सुरू झाली आहे. त्यामुळेच कृषी विभाग सक्रिय झाला आहे.

सहा हजार मेट्रिक टनाचा बंफर स्टॉक

युरियाची मागणी वाढल्यानंतर बाजारात युरियाचा तुटवडा निर्माण झाल्यास अशास्थितीसाठी जिल्ह्यात सहा हजार मेट्रिक टनाचा बंफर स्टॉक ठेवण्यात आला आहे. अत्यंत आणीबाणीच्या काळात शेतकऱ्यांना हा युरिया उपलब्ध होणार आहे. त्यामुळे शेतकऱ्यांनी जादा दराने युरिया घेऊन ठेवू नये, शेतकऱ्यांना आवश्यक तेवढा युरिया असल्याचे आवाहन कृषी विभागाकडून केले जात आहे.

(Verbal-complaints-of-farmers-will-be-heavy-on-agricultural-centers)