बोरीअरब (जि. यवतमाळ) : दारव्हा-यवतमाळ मार्गावरील बानायत येथे झाड दुचाकीवर कोसळून तरुण मुलगा जागीच ठार झाला, तर वडील गंभीर जखमी झाले. ही घटना शुक्रवारी (ता.26) सकाळी दहा वाजताच्या सुमारास घडली.
संजय प्रकाश चव्हाण (वय 25) असे मृताचे तर प्रकाश बबन चव्हाण (रा. पिंपळखुटा) असे जखमीचे नाव आहे. जखमी प्रकाश चव्हाण यांच्यावर यवतमाळच्या रुग्णालयात उपचार सुरू आहेत. दोघेही दुचाकीने यवतमाळला जात असताना लाडखेड शिवारातील बानायत येथे ही घटना घडली. जेसीबीने केबलसाठी झाडालगत खोदकाम करताना झाडाची मुळे सैल झाल्याने झाड दुचाकीवर कोसळले. जेसीबी मालकावर लाडखेड पोलिस ठाण्यात गुन्हा दाखल करण्यात आला आहे.