अमरावती : संत गाडगेबाबा अमरावती विद्यापीठात अभियांत्रिकी प्रथम वर्षाच्या (मॅकेनिक) विषयाच्या पेपरफुटीचे प्रकरण तापले. गुन्हा दाखल होताच, आरोपींना तत्काळ अटक करण्यासाठी युवा सेनेच्या पदाधिकाऱ्यांनी रविवारी (ता. नऊ) फ्रेजरपुरा ठाण्यावर धडक दिली.
वाशिम जिल्ह्यातील उकडी येथल्या संमती अभियांत्रिकी महाविद्यालयातील लिपिक आशीष एस. राऊत (रा. बोर्डी) यांच्यासह संतगाडगेबाबा अमरावती विद्यापीठातील रोजंदारी कर्मचारी या दोघांविरुद्ध विश्‍वासघातासह विद्यापीठ कायद्यान्वये गुन्हा दाखल झाल्यानंतर दोघेही पसार आहेत. रविवारपर्यंत (ता. नऊ) त्यापैकी कुणालाही अटक झाली नसल्याचे पोलिस निरीक्षक आसाराम चोरमले यांनी सांगितले. यासंदर्भात पोलिसांनी नेमके काय केले. याबाबत जाब विचारण्यासाठी युवासेनेचे जिल्हाप्रमुख आशीष माटोडे यांच्यासह काही पदाधिकाऱ्यांनी पोलिस निरीक्षक श्री. चोरमले यांना निवेदन सादर केले. यात सहभागी लोकांना तत्काळ अटक करण्याची मागणी त्यांनी रेटून धरली. युवासेनेच्या पदाधिकाऱ्यांनी विद्यापीठाचे कुलगुरूंची भूमिकाही पेपरफूट प्रकरणात संशयास्पद असल्याचा आरोप केला. याप्रकरणात एकापेक्षा अधिक लोक, अधिकारी, कर्मचारी, काही विद्यार्थी सहभागी असल्याने त्यांच्यावरही कायदेशीर कारवाई करावी, अशी मागणी यावेळी करण्यात आली. बेजबाबदार लोकांच्या वर्तणुकीमुळे हुशार विद्यार्थ्यांचे शैक्षणिक नुकसान होत आहे, असेही शिष्टमंडळाने यावेळी नमूद केले.

या कटात जे लोक सहभागी असतील, त्यापैकी कुणाचीही गय केली जाणार नाही. नियमानुसार पोलिस कारवाई करतील.
- आसाराम चोरमले,
पोलिस निरीक्षक, फ्रेजरपुरा ठाणे.