नागपूर - जिल्हा परिषदेत गेली चार वर्षे शांत असलेल्या विरोधकांनी आता आक्रमक पवित्रा घेतला आहे. सत्ताधाऱ्यांच्या घोटाळ्यांसोबत दुष्काळाचा मुद्दा येत्या सर्वसाधारण सभेत विरोधकांकडून मांडण्यात येणार आहे. त्यामुळे बुधवारची सभा वादळी ठरण्याचे संकेत आहेत.

राज्य सरकारने अलीकडेच राज्यातील १५१ तालुके दुष्काळग्रस्त घोषित केले आहेत. यात नागपुरातील काटोल, कळमेश्‍वर आणि नरखेड या तीन तालुक्‍यांचा समावेश आहे. परंतु, संपूर्ण जिल्ह्यावर दुष्काळाचे सावट असल्याने संपूर्ण जिल्हाच दुष्काळग्रस्त जाहीर करण्याची मागणी होती. गेल्या वर्षी बोंडअळीचा फटका असूनसुद्धा सर्वसाधारण शेतकऱ्याने किमान १० क्विंटल कापूस पिकविला होता. यंदा हा आकडा २ क्विंटलवर येऊन ठेपला आहे. शिक्षण, महिला, पंचायत विभागात भोंगळ कारभार सुरू आहे. गैरव्यवहार करणाऱ्या सचिवांना वाचविण्याचा प्रयत्न अधिकारी करीत आहेत. विनापरवानगी केसिंग पाइप टाकण्यात आले. यात मोठा घोळ आहे. याच्या चौकशीची मागणी यापूर्वी स्थायी समितीत विरोधकांकडून करण्यात आली आहे. उन्हाळ्यात बोअरवेलचे पूर्ण काम झाले आहे.  एनडीसीसी बॅंकेत जिल्हा परिषदेचे १२ कोटी पडून आहेत. हा पैसा परत सेस फंडात जमा करण्याचा ठरावही सभेत येणार असल्याची समजते.