‘अर्थ’बोध : ‘द ताओ ऑफ वॉरन बफे’

बफेटॉलॉजी आणि न्यू बफेटॉलॉजी या दोन ‘बेस्ट सेलर्स’चे लेखकद्वय मेरी बफे आणि डेव्हिड क्लार्क यांनी ‘द ताओ ऑफ वॉरन बफे’ या पुस्तकांत गुंतवणूक गुरु वॉरन बफे यांनी ठिकठिकाणी उच्चारलेल्या १२५ उदगारांचा संदर्भ आणि अर्थ वाचकांना समजावून सांगितला आहे. वॉरन बफे यांनी उच्चारलेले किंवा लिहिलेले प्रत्येक वाक्य अतिशय अर्थपूर्ण आणि गुंतवणूकदारांना मार्गदर्शक असते. त्यापैकी काही वाक्ये वानगीदाखल खाली देत आहे -

• शेअर म्हणजे कागदाचे सर्टिफिकेट अथवा इलेक्ट्रॉनिक एंट्री नसून, एखाद्या व्यवसायाचा मालकी हक्क असतो.

• अशा व्यवसायात गुंतवणूक करा, की जो एखादा मूर्ख माणूस सुद्धा चालवू शकेल; कारण भविष्यकाळात व्यवसाय एखाद्या मूर्खाच्या ताब्यात जाऊ शकतो.

• कोणतीही गुंतवणूक करताना तुमच्यात एवढे धाडस आणि स्वतःवर विश्वास पाहिजे, की तुम्ही आपल्या ‘नेटवर्थ’च्या दहा टक्के हिस्सा गुंतवायला सुद्धा मागेपुढे पाहणार नाहीत.

• आपण काय करतोय हे माहीत नसलेल्यांना एक वेळ परमेश्वर माफ करेल, पण शेअर बाजार कधीच माफ करीत नाही.

• सामूहिक निर्णयाची माझी कल्पना म्हणजे आरशासमोर उभे राहणे म्हणजे स्वतंत्ररित्या आणि अभ्यासपूर्वक गुंतवणुकीचा निर्णय घ्या, आपला निर्णय योग्य आहे की नाही, याची दुसऱ्यांकडून खात्री करून घेऊ नका.

• बेसबॉल खेळताना गोलंदाजाच्या हातात चेंडू असताना मी कधीच बॅट फिरवत नाही, म्हणजे तोट्यात असलेल्या कंपनीत मी कधीच गुंतवणूक करीत नाही.

• शेअर बाजारातील मध्यस्थ तुम्हाला सतत खरेदी-विक्री करायला लावून पैसा कमवतात, तर खरा गुंतवणूकदार बाजारात निष्क्रिय बनूनच पैसा कमवू शकतो.

चिनी तत्ववेत्ता लाओत्सु याच्या वाक्यांप्रमाणेच गुंतवणूक गुरु वॉरन बफे यांनी उच्चारलेले प्रत्येक वाक्यसुद्धा साधे; परंतु प्रभावकारी असते, याची प्रचिती हे पुस्तक वाचताना आपल्याला वारंवार येते.