भांडवली बाजार स्थिर 

मुंबई : जागातिक पातळीवरील अनिश्‍चिततेच्या पार्श्‍वभूमीवर सोमवारी (ता.11) भांडवली बाजारात मोठी उलथापालथ दिसून आली. दिवसअखेर सेन्सेक्‍स 21.47 अंशांच्या वाढीसह 40 हजार 345.08 अंशांवर बंद झाला. राष्ट्रीय शेअर बाजाराच्या निफ्टीत किरकोळ 5.30 अंशांची वाढ झाली आणि तो 11 हजार 913.45 अंशांवर बंद झाला. आज दिवसभरात निर्देशांकाने 266 अंशांची झेप घेतली होती. 

हॉंगकॉंगमधील अस्थिरता, अमेरिका-चीनमधील मधील व्यापारी संघर्ष यामुळे जगभरातील भांडवली बाजारांमध्ये अनिश्‍चिततेचे वातावरण दिसून आले. आशियातील बहुतांश भांडवली बाजारांमध्ये पडझड झाली. मूडीजे भारतीय अर्थव्यवस्थेची मानांकन कमी केल्याने सकाळपासून बाजारावर दबाव दिसून आला. आयटी, एफएमसीजी, एनर्जी, ऑटो, टेक, कॅपिटल गुड्‌स आदी क्षेत्रीय निर्देशांकात घसरण झाली. येस बॅंकेच्या शेअरमध्ये आज मोठी उसळी दिसून आली. येस बॅंकेचा शेअर 5.80 टक्‍क्‍यांनी वधारला. टाटा मोटर्स, आयसीआयसीआय बॅंक, इंड्‌सइंड बॅंक, ऍक्‍सिस बॅंक, कोटक बॅंक आणि टाटा स्टील आदी शेअर तेजीसह बंद झाले. हिरो मोटोकॉर्प, वेदांता, टीसीएस, रिलायन्स इंडस्ट्रीज, एशियन पेंट्‌स, मारुती आणि महिंद्रा अँड महिंद्रा आदी शेअर घसरणीसह बंद झाले. मिडकॅप आणि स्मॉलकॅपमध्ये आज खरेदी दिसून आली. 

वाहन उत्पादकांची निराशाजनक आकडेवारी, जागतिक बाजारातील नकारात्मक संकेतांनी भांडवली बाजारातील मूड बदलल्याचे जिओजित फायन्शिअल सर्व्हिसेसचे मुख्य विश्‍लेषक विनोद नायर यांनी सांगितले. मंगळवारी (ता.12) चलनवाढीची आकडेवारी जाहीर होणार आहे. त्याकडे गुंतवणूकदारांचे लक्ष असेल. किरकोळ बाजारात भाजीपाला, कांदे यासारख्या वस्तूंच्या किंमती वाढल्याने चलनवाढीचा पारा आणखी चढेल, असा अंदाज जाणकारांकडून व्यक्त करण्यात आलेला आहे. 

web title : Capital markets is Stable