इराणकडून होणारी तेल आयात घटली

नवी दिल्ली - अमेरिकेने इराणकडून खनिज तेल खरेदी करण्यास मज्जाव केल्यानंतर भारताने या देशाकडून होणारी आयात लक्षणियरीत्या घटवली आहे. एप्रिल महिन्यातील आकडेवारीनुसार, इराणकडून झालेली खनिज तेलाची आयात गेल्या वर्षीच्या तुलनेत ५७ टक्‍क्‍यांनी कमी असल्याची माहिती सूत्रांनी दिली. 

एप्रिल महिन्यात इराणकडून प्रतिदिन सुमारे २,७७,६०० बॅरल खनिज तेलाची आयात झाली असून, ती मार्च महिन्याच्या तुलनेत ३१.५ टक्‍क्‍यांनी कमी आहे. जानेवारी ते एप्रिलदरम्यान सरासरी आयात सुमारे ४५ टक्‍क्‍यांच्या घसरणीसह प्रतिदिन ३,०४,५०० बॅरल राहिली. गतवर्षी याच कालावधीत ती ५,५२,००० बॅरल इतकी होती.