Inflation : मार्चमध्ये वाढली महागाई; सरकारने जाहीर केली आकडेवारी

देशभरातील महागाई सध्या दिवसेंदिवस वाढतंच चालली असून यामुळे सर्वसामान्यांना फटका बसताना दिसत आहे. पेट्रोल डीझेलसहीत बाकींच्या वस्तूंनाही महागाईच्या झळा बसताना आपल्याला पहायला मिळत आहेत. दरम्यान सरकारने या महिन्याची महागाईच्या दराच्या सरासरीची आकडेवारी जाहीर केली आहे.

फेब्रुवारी महिन्याच्या तुलनेत मार्च महिन्यात महागाई वाढल्याचं या आकडेवारीवरुन समजटतंय. सरकारने जाहीर केलेल्या आकडेवारीनुसार मार्चमध्ये महागाईचा दर हा ६.९५ टक्के इतका झाला आहे. दरम्यान याअधीच्या महिन्यात म्हणजे फेब्रुवारीमध्ये महागाईचा दर हा ६.०७ टक्के इतका होता. फेब्रुवारीच्या तुलनेत मार्चमध्ये ०.८८ टक्क्यांनी महागाई वाढल्याचं यावरुन सिद्ध झालं आहे.

दरम्यान देशभरातील जनतेला याचा फटका बसणार आहे. खाद्यतेल, इंधन, जीवनावश्यक वस्तूंच्या वाढत्या किंमतीमुळे सामान्यांच्या खिशाला कात्री बसणार आहे. मागील एका महिन्यापासून पेट्रोलच्या आणि डीझेलच्या दरात दिवसेंदिवस वाढ होत आहे. आणि सरकारच्या या आकडेवारीनुसार जनतेला दिलासा मिळणार नाही हे स्पष्ट झालंय. विविध रिपोर्टनुसार महागाईचा टक्का वाढणार असल्याचं बोललं जात होतं. त्यानुसार सरकारने जाहीर केलेल्या आकडेवारीनुसार देशातील महागाई ६.९५ टक्क्यापर्यंत वाढली असल्याचं समजतंय.