विमानप्रवासाची पुढीलवर्षी हनुमानउडी; मॉर्गन स्टॅन्लेचा अहवाल

मुंबई : कोरोनामुळे (corona) थंडावलेला जागतिक विमानप्रवास (Airplane travelling) पुढीलवर्षी हनुमानउडी घेण्याची अपेक्षा आहे. मात्र त्यात पूर्वीप्रमाणे वाढ होण्यास वेळ लागेल, असा अहवाल मॉर्गन स्टॅन्ले (morgan stanlay) तर्फे देण्यात आला आहे. पुढीलवर्षी कंपन्यांच्या अधिकाऱ्यांच्या (company authorities) प्रवासात वाढ होईल, मात्र कोरोनापूर्व काळाचा (corona) विचार केला तर यावर्षीही विमानप्रवास निम्म्याने कमीच राहण्याची शक्यता आहे. अद्यापही सर्वत्र व्हर्चुअल मिटींग (virtual meeting) तसेच वर्क फ्रॉम होम असल्याने प्रवासाचे प्रमाण कमीच राहील, असे दाखवून दिले जात आहे.

आता प्रवासीच विमानप्रवासाला उत्सुक आहेत. त्यामुळे कोरोनापूर्व काळाच्या तुलनेत पुढीलवर्षी विमानप्रवासाचे प्रमाण 78 टक्क्यांपर्यंत जाईल, असे मॉर्गनच्या ग्लोबल कॉर्पोरेट ट्रॅव्हल सर्व्हे 2021 मध्ये म्हटले आहे. परदेश प्रवासाबाबत कंपन्या हात आखडता घेणार असल्या तरी देशांतर्गत छोटा विमानप्रवास करणाऱ्यांची संख्या वाढेल, असाही अंदाज आहे.

मॉर्गनतर्फे अमेरिका, युरोपसह जगातील अनेक ट्रॅव्हल कंपन्यांशी बोलून हे सर्वेक्षण करण्यात आले. प्रवासीसंख्या वाढण्याच्या बेतात असली तरीही कंपन्यांचा विमानप्रवासावरील खर्च पुढीलवर्षीही कमीच राहील असा 77 टक्के सहभागींचा अंदाज आहे. पुढील वर्षअखेरीस हवाईप्रवास पूर्वपदावर येईल, असे 43 टक्के मॅनेजरना वाटते तर 27 टक्के लोक याच्याशी सहमत नाहीत.

विमानप्रवासाच्या बाबतीत छोट्या कंपन्या लौकर पूर्वपदावर येतील, मात्र मोठ्या कंपन्या या खर्चात कपात करतील. सध्या व्हर्चुअल मिटिंग सुरु असल्याने ही स्थिती राहणार आहे. कोरोनाची भीती हळुहळू जाईल, मात्र कॉस्ट कटिंग, कर्मचाऱ्यांचा वेळ वाचवणे आदी कारणांमुळे व्हर्चुअल मिटिंग सुरूच राहतील, असाही अंदाज आहे. कोरोनामुळे खासगी विमानांचा वापरही वाढला आहे, तो तसाच राहील किंबहुना वाढेलही असे अनेक कंपन्यांचे म्हणणे आहे.