नोटाबंदीच्या काळात दागिने विकणाऱ्या सराफांना नोटीस 

नवी दिल्ली - पंतप्रधान नरेंद्र मोदी यांनी केलेल्या नोटाबंदीच्या काळात सोन्या-चांदीच्या दागिन्यांची विक्री करणाऱ्या सराफांना प्राप्तिकर विभागाने नोटीस पाठवली आहे. पंतप्रधान मोदींनी 2016 मध्ये पाचशे आणि एक हजाराच्या जुन्या नोटा चलनातून रद्द केल्यानंतर नागरिकांनी मोठ्या प्रमाणावर सोन्याच्या दागिन्यांची खरेदी केली होती. याच पार्श्वभूमीवर सराफांना प्राप्तिकर नोटीस पाठवण्यात आली आहे. 

- ताज्या बातम्यांसाठी डाऊनलोड करा ई-सकाळचे ऍप

काळा पैसा लपविण्यासाठी बहुतांश लोकांनी सोन्याच्या खरेदीला प्राधान्य दिले. एका सराफाने नाव जाहीर न करण्याच्या अटीवर दिलेल्या माहितीनुसार, एकाच दिवसात त्याच्या दुकानातील सर्व सोने-चांदी आणि दागिन्यांची विक्री झाली होती. दोन आठवड्यांत जेवढी विक्री होते तेवढी एकाच दिवसात झाली. तीन महिन्यांपूर्वी अचानक त्यांना प्राप्तिकर विभागाची नोटीस मिळाली. त्यामध्ये मिळालेल्या मालमत्तेचा स्रोत आणि नोटाबंदीच्या काळात जमा झालेला सर्व महसूल जमा करण्याचा आदेश देण्यात आला आहे. सराफाने फक्त आडनाव जैन असल्याचे जाहीर केले आहे. 

सराफाकडून आता नोटिशीला आव्हान देण्यात आले आहे. मात्र, कायद्याप्रमाणे त्यांना त्या वादग्रस्त रकमेतील 20 टक्के रक्कम जमा करावी लागेल. तसेच निर्णय विरोधात गेल्यास सर्व रक्कम जमा करण्यासाठी व्यवसाय बंद करावा लागेल, असे सराफाने सांगितले. ज्वेलर्स असोसिएशनच्या सचिवांनी दिलेल्या माहितीनुसार, जैन यांच्याप्रमाणे एकूण 15 हजार सराफांना नोटीस पाठवण्यात आली आहे.