जेट एअरवेजचे 1,000 हुन अधिक पायलट एक एप्रिलपासून संपावर

मुंबई: कर्जाच्या विळख्यात सापडलेल्या जेट एअरवेजचे 1,000 हुन अधिक पायलट एक एप्रिलपासून संपावर जाण्याच्या तयारीत आहेत. जेटच्या पायलटचे पगार अनेक दिवसांपासून थकलेले आहेत. या पार्श्वभूमीवर पायलटच्या संघटनेने याआधीही कंपनीला संपावर जाण्याचा इशारा दिला आहे. पायलटचे थकीत वेतन देण्यात आले नाही तसेच 31 मार्चपर्यंत यातून मार्ग काढण्यात आला नाहीतर 1 एप्रिलपासून संपावर जाण्याचा इशारा नॅशनल एव्हिएटर्स गिल्ड (एनएजी) या पायलटच्या संघटनेने मागील आठवड्यात दिला होता. 

मात्र कर्जाच्या विळख्यात अडकलेल्या जेटच्या मॅनेजमेंटवर आता कर्ज देणाऱ्या बॅंकांचे नियंत्रण आहे. स्टेट बॅंक ऑफ इंडियाच्या नेतृत्वाखालील बॅंकांच्या गटाने आता जेट एअरवेजचे व्यवस्थापन आपल्या ताब्यात घेतले आहे. एसबीआयकडून 29 मार्चपर्यत पतपुरवठा होण्याची अपेक्षा होती. मात्र अजूनही हा पतपुरवठा न झाल्यामुळे जेटचे व्यवस्थापन पायलटचा पगार देऊ शकलेले नाही. मुंबई आणि दिल्ली येथील पायलटनी संयुक्तपणे एक एप्रिलपासून संपावर जाण्याच निर्णय घेतला आहे.