PIB फॅक्ट चेक : 15000 रुपये अन् सरकारी नोकरी; जाणून घ्या, संपूर्ण सत्य?

नवी दिल्ली : सध्या सोशल मीडियावर अनेक प्रकारच्या पोस्ट व्हायरल होत आहेत, ज्यामध्ये सरकारी योजनेत पैसे देण्याचा दावा केला जात असून, बनावट पत्राद्वारे पीएम-वाणी योजनेअंतर्गत 650 रुपये भरून वाय-फाय पॅनेल, 15,000 भाडे आणि नोकरी देण्याचे आश्वासन दिले जात आहे. दरम्यान, या योजनेची सत्यता जाणून घेण्यासाठी, पीआयबीने तथ्य तपासणी केली आहे. ज्यामध्ये सरकारी योजनेच्या नावाखाली नागरिकांना जाळ्यात ओढण्याचा प्रयत्न सुरू काही भामट्यांनी सुरू केला आहे. (PIB Fact Check On PM Wani Scheme)

पीआयबीने केले ट्वीट

दरम्यान, मोठ्या प्रमाणात व्हायरल होणाऱ्या मेसेजनंतर पीआयबीने ट्वीट करत नागरिकांना अशा स्वरुपाच्या आमिषांना बळी न पडण्याचे आवाहन केले आहे. तसेच बनावट पत्राद्वारे पीएम-वाणी योजनेअंतर्गत 650 रुपये भरून वाय-फाय पॅनेल, 15,000 भाडे आणि नोकरी अशा कोणत्याही देयकाची मागणी दूरसंचार विभागाकडून केली जात नसल्याचे स्पष्ट केले आहे. तसेच पीएम वाणीशी संबंधित योग्य माहितीसाठी https://pib.gov.in/PressReleasePage.aspx?PRID=1679342 या संकेत स्थळावर भेट देण्यास सांगण्यात आले आहे.

खोटे मेसेज शेअर करू नका

पीआयबीने केलेल्या तथ्य तपासणीनंतर मोठ्या प्रमाणात व्हायरल होणारा हा संदेश पूर्णपणे बनावट असल्याचे म्हटले आहे. सोशल मीडियावर व्हायरल होणाऱ्या अशा मेसेजपासून प्रत्येकाने सावध राहावे, असे पीआयबीने म्हटले आहे. तसेच PIB ने लोकांना असे मेसेज फॉरवर्ड न करण्यास सांगितले आहे. अशा संदेशांद्वारे दिशाभूल करून, तुम्ही तुमची वैयक्तिक माहिती आणि पैसा धोक्यात आणत आहात त्यामुळे सावध राहण्याचे आवाहन पीआयबीने नागरिकांना केले आहे.

कोणीही करू शकतो फॅक्ट चेक

दरम्यान, कोणत्याही योजनेसंदर्भातील मेसेज तुम्हाला प्राप्त झाला असेल आणि त्याबाबत तुम्हाला शंका असेल तर, तुम्हीदेखील PIB द्वारे तथ्य तपासणी करू शकता. यासाठी तुम्हाला https://factcheck.pib.gov.in/ या अधिकृत लिंकला भेट द्यावी लागेल. याशिवाय, तुम्ही व्हॉट्सअॅप नंबर +918799711259 किंवा ईमेल: pibfactcheck@gmail.com वर व्हिडिओ पाठवू शकता.