Share Market: दमदार सुरुवातीनंतर जोरदार घसरण; सलग सहाव्या दिवशी सेन्सेक्स-निफ्टी घसरला

Share Market Updates: शेअर बाजारातील घसरणीचं सत्र आज सलग सहाव्या दिवशीही सुरूच राहिले. दमदार सुरुवातीनंतर दिवसभरात शेअर बाजारात सातत्याने घसरण होत राहिली आणि दिवसअखेर सेन्सेक्स आणि निफ्टी निर्देशांक लाल रंगात बंद झाले. सेन्सेक्स 136.69 अंकांनी अर्थात 0.26 टक्क्यांनी घसरून 52793.62वर बंद झाला तर निफ्टी 25.85 अंकांनी अर्थात 0.16 टक्क्यांनी घसरून 15,782.15वर बंद झाला. निफ्टी 50 मधील 25 शेअर्समध्ये वाढ झाली, तर 25 शेअर्समध्ये घसरण नोंदवली गेली.

टाटा मोटर्स (TATAMOTORS), सनफार्मा (SUNPHARMA), महिंद्रा अॅण्ड महिंद्रा (M&M), हिंदुस्तान युनिलिव्हर (HINDUNILVR), टायटन (TITAN) हे शेअर्स आजचे टॉप गेनर्स ठरले. तर HINDALCO, SBIN, JSWSTEEL, ICICIBANK, BHARTIART या शेअर्समध्ये घसरण नोंदवली गेली.

तत्पूर्वी आज सलग पाच दिवसांच्या घसरणीनंतर आज शेअर बाजाराने दमदार सुरुवात केली. शेअर बाजाराच्या दोन्ही निर्देशांकांमध्ये आजच्या दिवसाच्या सुरुवातीला मोठी वाढ झाली आहे. सेन्सेक्स आणि निफ्टी दोन्ही निर्देशांकांनी गॅप अप ओपनिंग दिलं. आजच्या दिवसाच्या सुरुवातीला सेन्सेक्स 635.43 अंकांनी वधारून 53,565.74 वर सुरू झाला. तर निफ्टी 169 अंकांनी वधारून वर 15,977.00 सुरू झाला.