Share Market: शेअर बाजारातील तेजीला ब्रेक; सेन्सेक्स 305 तर निफ्टी 70 अंकांनी घसरला

Share Market Updates: सकारात्मक सुरुवातीनंतरही आज दिवसअखेर शेअर बाजारात घसरण झाल्याचं पाहायला मिळालं. सेन्सेक्स 304.48 अंकांनी म्हणजेच 0.53 टक्क्यांनी घसरून 57684.82 वर बंद झाला, तर निफ्टीही 69.85 अंकांनी म्हणजेच 0.40 टक्क्यांनी घसरून 17,245.65 वर बंद झाला. तत्पूर्वी आज सकाळी शेअर बाजाराची स्थिर सुरुवात झाली. सेन्सेक्स 209.34अंकांनी वाढून 58,198.64 वर सुरु झाला. दुसरीकडे, निफ्टी 2.8 अंकांच्या वाढीसह 17,120.40 वर सुरु झाला. निफ्टी 50 मधील 29 शेअर्समध्ये घसरण झाली.

मंगळवारी इक्विटी मार्केटमध्ये जोरदार रिकव्हरी दिसून आली होती. ऑटो बँक आयटी, ऑईल अँड गॅस शेअर्समध्ये जोरदार खरेदीमुळे सेन्सेक्स-निफ्टी 1 टक्क्यांहून अधिक वाढीसह बंद झाले. शेवटी सेन्सेक्स 696.81 अंकांनी म्हणजेच 1.22 टक्क्यांनी वाढून 57,989.30 वर बंद झाला. दुसरीकडे, निफ्टी 197.90 अंकांच्या अर्थात 1.16 टक्क्यांच्या वाढीसह 17,315.50 वर बंद झाला.