टीसीएसचे भांडवली बाजारमूल्य साडेतेरा लाख कोटी रुपयांवर

मुंबई : टाटा कन्सलटन्सी सर्व्हिसेस (TCS) या शेअरचे भांडवली (share market) बाजारमूल्य आज साडेतेरा लाखकोटी रुपयांवर गेले. आता टीसीएस ही सर्वात जास्त भांडवली बाजारमूल्य (market value) असलेल्या रिलायन्स इंडस्ट्रीज (reliance) मागोमाग दुसरी कंपनी आहे. एखाद्या कंपनीच्या शेअरबाजारातील एकूण समभागांना त्या कंपनीच्या शेअरच्या बंद भावाने गुणले की त्या कंपनीचे भांडवली बाजारमूल्य मिळते.

आजच्या बंद बाजारभावानुसार रिलायन्स चे भांडवली बाजारमूल्य 13 लाख 96 हजार 135 कोटी रुपये आहे. तर टीसीएस चे भांडवली बाजारमूल्य 13 लाख 53 हजार 667 कोटी रुपये आहे. 17 ऑगस्ट रोजी टीसीएस ने 13 लाखकोटी रुपये भांडवली बाजारमूल्याचा टप्पा पार केला होता. आज टीसीएस च्या शेअरचा भाव 47 रुपयांनी वाढून 3,659 रुपयांपर्यंत पोहोचला.