Coronavirus : चमकोगिरी करणाऱ्यांना आयुक्तांकडून आळा

पिंपरी - कोरोनाच्या पार्श्‍वभूमीवर शहरातील काही नागरिक, खासगी संस्था व नगरसेवक आपापल्या भागात जंत व कीटकनाशक फवारणी करून चमकोगिरी करीत आहेत. मात्र, असे करणे बेकायदा असून, हा सरकारी आदेशाचा भंग आहे. अशा चमकोगिरीला आळा घालण्यासाठी महापालिका आयुक्त श्रावण हर्डीकर यांनी फवारणी न करण्याचे आवाहन केले आहे. महापालिकेमार्फत आवश्‍यक ठिकाणी फवारणी केली जात असल्याचेही त्यांनी स्पष्ट केले आहे. 

बातम्या ऐकण्यासाठी डाऊनलोड करा ई-सकाळचे ऍप

आयुक्त हर्डीकर यांनी आदेशात म्हटले आहे की, शहरातील काही नागरिक, खासगी संस्था व नगरसेवक यांच्याकडून त्यांच्या परिसरात स्वेच्छेने जंत व कीटकनाशक फवारणी केली जात आहे. मात्र, सरकारच्या आदेशानुसार अशा प्रकारे सार्वजनिक ठिकाणी फवारणी करणे बेकायदा असून, कोणत्याही व्यक्तीस सार्वजनिक ठिकाणी फवारणी करण्यास परवानगी नाही. केवळ महापालिकेच्या आरोग्य विभागामार्फत शास्त्रोक्त पद्धतीने आवश्‍यक ठिकाणी फवारणी करण्यात येत आहे. त्यामुळे नागरिकांनी स्वत:हून फवारणी करण्याची आवश्‍यकता नाही. तसेच, फवारणी करणाऱ्या महापालिका कर्मचाऱ्यांना कोणत्याही सूचना अथवा मार्गदर्शन करू नये.