Ganesh Festival 2023 : प्रथम पूजेचा मान गणेशासच का? इथे वाचा सविस्तर

Ganesh Festival 2023 : कोणतेही मंगल कार्य करण्यापूर्वी आरंभी गणेशाचे स्मरण करून ते काम करावे, असा परिपाठ आहे. किंबहुना कार्यात विघ्न येऊ नये व कार्य सिद्धीस जावे यासाठी अजूनही सर्वप्रथम गणेशाची पूजा व वंदन करायचा परिपाठ आहे. सर्व संतांनी लिहिलेल्या ग्रंथांच्या आरंभीही गणेशस्तवन करूनच पुढे मूळ ग्रंथास सुरुवात केलेली आढळते. किंबहुना, गणेश स्तवनाशिवाय कोणत्याही ग्रंथाची सुरुवात केलेली आढळणे विरळाच.

(लोकल ते ग्लोबल लेटेस्ट अपडेट मिळवा सकाळच्या व्हॉट्सअप चॅनेलवर फक्त एका क्लिकमध्ये)

सर्व देवतांमध्ये गणेशासच अग्रपूजेचा मान का?

पद्मपुराण सृष्टिखंडानुसार, माता पार्वतीच्या वरदानानुसार गणेशास हा मान प्राप्त झालेला आहे. गणपतीने मातापित्यांची केलेली सेवा हे त्याचे मुख्य कारण. पद्मपुराणानुसार, सर्वप्रकारची तीर्थस्नाने, दान, यज्ञ, व्रते इत्यादी मातापितापूजनाच्या सोळाव्या हिश्शाचीदेखील बरोबरी करू शकत नाहीत. (Ganesh Chaturthi Festival)

गणपती अथर्वशीर्षातही 'ब्रह्मभूर्भुवःस्वरोम्' असे गणेशास संबोधलेले आहे. या ओम् चा उच्चार हा सर्व मंत्रांच्या आरंभी केला जातो; किंबहुना ओम्कारास अग्रक्रम दिलेला आहे. ओम्काराचे उच्चारण न करता विशिष्ट मंत्र पठण केल्यास त्याचे संपूर्ण फळ प्राप्त होत नाही, असे मंत्रशास्त्र सांगते.

गणेश हा ओम्कारस्वरूप असल्यामुळे सर्व धार्मिक व मंगल कार्यांमध्ये त्यास अग्रक्रम दिलेला आहे, तसेच गणेशापासूनच सर्व देवतांची उत्पत्ती झाली, असे अथर्वशीर्षात सांगितलेले आहे. त्यामुळे गणेशास 'आदिदेव' असेही म्हणतात. आदिदेव असल्यामुळे गणेशाचे स्मरण सर्वप्रथम करतात. आणखी वैशिष्ट्यपूर्ण गोष्ट म्हणजे पुराणांमध्ये गणेशाची सर्व देवतांनी स्तुती केलेली आढळते.