5G Launch : डेटा स्वस्तच झाला, सध्या किती पैसे वाचतात? PM मोदींनी सांगितला हिशोब

नवी दिल्ली : पंतप्रधान नरेंद्र मोदी यांनी नवी दिल्लीत शनिवारी (दि.1) 5G सेवा लॉन्च केली. यावेळी मोदींनी भारतात इंटरनेट क्षेत्रात कशी क्रांती झाली तसेच डेटा कसा स्वस्त होत गेला हे देखील सांगितलं. यासाठी त्यांनी सगळाच हिशोबचं समोर ठेवला. इंडिया मोबाईल काँग्रेसच्या सहाव्या सत्रामध्ये पंतप्रधान बोलत होते.

मोदी म्हणाले, "पूर्वी भारतातल्या नागरिकांना एक जीबी डेटासाठी 300 रुपये मोजावे लागत होते. आज तेवढाच डेटा केवळ 10 रुपयांना मिळतोय, म्हणजेच साधारण एक माणूस महिन्याकाठी 14 जीबी डेटा खर्च करायचा. त्यामुळे त्याला महिन्याला 4 हजार 200 रुपये खर्च करावे लागत होते. परंतू आता केवळ 150 रुपयांमध्ये तेवढाच डेटा मिळतोय. त्यामुळे सामान्यांचे महिन्याकाठी 4,000 रुपये वाचतात"

आज झपाट्याने बदलत चाललेल्या जगामध्ये भारताला सर्वोच्च स्थानी जाण्यापासून कुणीही रोखू शकणार नाही. भारतीय त्याबाबतील तडजोड करणार नाहीत. आता चौथ्या औद्योगिक क्रांतीचं नेतृत्व भारतच करेल, असा विश्वासही यावेळी पंतप्रधान मोदींनी व्यक्त केला.

दरम्यान, यावेळी पंतप्रधानांना जिओ, एअरटेल या कंपन्यांनी 5Gचे प्रात्यक्षिक दाखवले. यावेळी मोदींनी जिओ ग्लास आणि 5G उपकरणांची पाहाणीही केली.