बालाकोट एअर स्ट्राईकचे हिरो अभिनंदन वर्धमान यांची बढती

भारतीय हवाई दलाचे पायलट विंग कमांडर अभिनंदन वर्धमान (Abhinandan Varthaman) यांना हवाई दलाकडून ग्रुप कॅप्टन या पदावर बढती देण्यात आली आहे. बालाकोट एअर स्ट्राईक दरम्यान पाकीस्तानशी झालेल्या संघर्षात भारतीय हवाई हद्दीच संरक्षण करताना अभिनंदन यांचं मिग -21 हे लढाऊ विमान पाकव्याप्त काश्मीरमध्ये पडल्यानंतर पाकिस्तानी लष्कराने त्यांना ताब्यात घेतले होते. अभिनंदन हे श्रीनगरच्या 51 स्क्वॉड्रनचा भाग असताना 27 फेब्रुवारी 2019 रोजी पाकिस्तानने केलेल्या हवाई हल्ल्याला हाणून पाडण्यासाठी त्यांनी मिग-21 विमानासह उड्डाण घेतले होते. यावेळी त्यांचं विमान पाक व्याप्त काश्मीरमध्ये पडलं होतं.

पाकिस्तानचं एफ-16 हे विमान पाडणाऱ्या अभिनंदन यांना शौर्यचक्र पुरस्कारानं देखील सन्मानित करण्यात आलं आहे. देशाच्या संरक्षणाची जबाबदारी पार पाडणाऱ्या अभिनंदन यांना भारतीय वायुदलाकडून ग्रुप कॅप्टन या पदावर बढती देण्यात आली असून लवकरच ते या पदाचा पदभार स्वीकारणार आहेत. ग्रुप कॅप्टन पद भारतीय सैन्यातील कर्नलच्या बरोबरीचं पद आहे.

दरम्यान, पाकिस्तानी लष्कराने ताब्यात घेतलेल्या अभिनंदन यांना सोडवण्यासाठी आंतरराष्ट्रीय स्तरावर भारताकडून मोठ्या प्रमाणावर दबाव निर्माण करण्यात आला होता. त्यानंतर पाकिस्तानी लष्कराला त्यांची सुटका करणे भाग पडले.