'हर घर दस्तक' मोहिमेला सुरुवात; आता घरोघरी मिळणार लस!

नवी दिल्ली : भारतानं १०० कोटी डोसचा टप्पा पार केल्याच्या विक्रमी कामगिरीनंतर आता ही लसीकरण मोहिम अधिक व्यापक स्वरुपात राबवण्यात येणार आहे. याद्वारे प्रत्येक घरातील प्रत्येक व्यक्तीला लस मिळावी यासाठी पंतप्रधान नरेंद्र मोदी यांनी आज (बुधवार) 'हर घर दस्तक' या मोहिमेला सुरुवात केली. केंद्रीय आरोग्य मंत्री मनसुख मांडवीय यांनी याची माहिती दिली.

मांडवीय यांनी ट्विट करुन सांगितलं की, कोरोना प्रतिबंधक लसीच्या १०० कोटी डोस देऊन भारतानं ऐतिहासिक कामगिरी केल्यानं संपूर्ण जग भारताचं कौतुक करत आहे. मोदी सरकारनं प्रत्येक भारतीयाची सुरक्षेसाठी महत्वाची पावलं उचलली आहेत. त्याचअनुषंगानं हर घर दस्तक ही मोहिमही सुरु केली आहे. ही मोहिम आम्ही घरोघरी नेणार आहोत.

मोदींनी काय म्हटलं?

G20 शिखर संमेलन आणि COP26 या परिषदांमध्ये भाग घेतल्यानंतर पंतप्रधान नरेंद्र मोदी यांनी कमी लसीकरण झालेल्या जिल्ह्यांच्या जिल्हाधिकाऱ्यांसोबत व्हिडिओ कॉन्फरन्सिंगद्वारे बैठक घेतली. या बैठकीत पंतप्रधान आरोग्य कर्मचाऱ्यांना उद्देशून म्हणाले, आजवर आपण सर्वांनी लोकांना लसीकरण केंद्रांवर पोहोचवण्यासाठी आणि सुरक्षित लसीकरणासाठी व्यवस्थापन केलं. आता प्रत्येक घरी लस, घरोघरी लस या ध्येयानं आपल्याला आता प्रत्येक घरी पोहोचायचं आहे. मोदी म्हणाले, प्रत्येक घर ठोठावताना पहिल्या डोसनंतर आपल्याला दुसऱ्या डोसकडेही तितकचं लक्ष द्यावं लागेल. कारण जेव्हा संसर्गाचं प्रमाण कमी होताना दिसतं तेव्हा दुसरा डोस वेळेत घेण्याची भावना कमी होते.