कुंभमेळ्यात लहान मुलं हरवू नयेत म्हणून काय केलंय?

प्रयागराज : प्रयागराज येथील अर्धकुंभमेळ्याला जवळपास बारा कोटी नागरिक भेट देण्याची शक्‍यता असल्याने या प्रचंड आकाराच्या सोहळ्यात लहान मुले हरविण्याची दाट शक्‍यता आहे. ही शक्‍यता लक्षात घेऊनच चौदा वर्षांखालील मुलांना "रेडिओ फ्रिक्वेन्सी आयडेन्टिफिकेशन' टॅग उत्तर प्रदेश पोलिस देणार आहेत. यामुळे मुले हरविल्यास त्यांना शोधणे सोपे जाणार आहे. 

पोलिसांनी यासाठी व्होडाफोन कंपनीचे सहकार्य घेतले असून, एकूण चाळीस हजार टॅग तयार करण्यात आले आहेत. कुंभमेळ्याच्या परिसरात सर्वत्र चौकशी केंद्र उभारले जाणार असून, त्या ठिकाणी अत्याधुनिक यंत्रणा उभारली जाणार आहे. त्यामुळे मुले हरविल्यास पालकांना पोलिसांशी संपर्क साधून मुलांना शोधणे सोपे जाणार आहे. सर्वत्र एलईडी स्क्रीनदेखील उभारले असून, त्याद्वारेही विविध माहिती नागरिकांसाठी प्रसिद्ध केली जाणार आहे. 

किन्नर आखाडा-जुना आखाडा 
कुंभमेळ्यातील उद्याच्या (ता. 15) पहिल्या शाही स्नानात सहभागी होण्यासाठी किन्नर आखाडा आज अधिकृतपणे जुना आखाडाला जाऊन मिळाला. किन्नर हा वेगळा आखाडा म्हणून कायम राहणार असून, केवळ शाही स्नानासाठी हे दोन आखाडे एक झाले आहेत, असे या आखाड्याच्या प्रमुख महामंडलेश्‍वर लक्ष्मीनारायण त्रिपाठी यांनी सांगितले. किन्नर आखाडा कुंभमेळ्यात प्रथमच सहभागी झाला आहे.