Amit Shah : पुणे, मुंबईसह सात शहरांसाठी आपत्ती निवारणासाठी ८ हजार कोटी; गृहमंत्री शहा यांची घोषणा

नवी दिल्ली : केंद्रीय गृहमंत्री अमित शहा यांच्याकडून मंगळवारी आठ हजार कोटींच्या तीन महत्त्वाच्या योजनांची घोषणा केली. यामध्ये सर्व राज्यांतील अग्निशामक दलांचे आधुनिकीकरण, पुणे व मुंबईसह सात प्रमुख शहरांतील पूर नियंत्रण आणि १७ राज्यांमध्ये भूस्खलनावर उपाययोजना करणे या या योजनांचा समावेश आहे.

देशातील सर्व राज्ये व केंद्रशासित प्रदेशांच्या आपत्ती नियंत्रण मंत्र्यांची बैठक आज शहा यांच्या अध्यक्षतेखाली झाली. पुढील काळात कोणत्याही आपत्तीमध्ये एकाही नागरिकाचा जीव जाणार नाही, अशा उपाययोजना करण्यावर भर असल्याचे त्यांनी यावेळी स्पष्ट केले.

अग्निशामक दलाच्या आधुनिकीकरणासाठी पाच हजार कोटी रुपयांचा निधी सर्व राज्यांना देण्यात येणार असून, राज्यातील पुणे, मुंबईसह चेन्नई, कोलकता, बंगळूर, अहमदाबाद, हैदराबाद या प्रमुख शहरांतील पूर नियंत्रणासाठी अडीच हजार कोटी आणि देशातील १७ राज्यांतील भूस्खलनावरील उपाययोजनांसाठी ८२५ कोटींचा केंद्र सरकारतर्फे निधी देणार असल्याचे शहा यांनी सांगितले.

राष्ट्रीय आपत्ती निवारण यंत्रणेने देशात अणुऊर्जा केंद्रे असलेल्या सात ठिकाणी भेट देऊन संबंधित राज्यांना सूचना केल्या आहेत. परिणामी, कोणतीही आपत्तीजन्य परिस्थिती उद्‍भवल्यास त्याचे निवारण करणे सोपे जाईल. अणुप्रकल्पांची उभारणी करताना आपत्ती निवारणाच्या उपाययोजनांची योग्यप्रकारे अंमलबजावणी करावी, त्यानंतरच वीजनिर्मिती सुरू करणे, अत्यंत आवश्यक असल्याचेही ते म्हणाले.