Loksabha 2019 : अमित शहांसाठी अडवानींचे तिकीट कापणार?

नवी दिल्ली : भाजपचे ज्येष्ठ नेते लालकृष्ण अडवानी यांचे गुजरातमधील उमेदवारांच्या यादीतून नाव कापण्याचे शक्यता आहे. कारण, भाजपचे राष्ट्रीय अध्यक्ष अमित शहा यांना गांधीनगरमधून उमेदवारी देण्याचे जवळपास निश्चित झाले आहे.

गांधीनगर मतदारसंघातून अमित शहा यांना उमेदवारी देण्याची मागणी गुजरात प्रदेश समितीने भाजपच्या केंद्रीय निवडणूक समितीकडे केल्याची माहिती मिळत आहे. अडवानींऐवजी अमित शहांना उमेदवारी देण्याच्या हालचाली सुरू झाल्या आहेत. अडवानी यांच्या वयामुळे त्यांना उमेदवारी न देता सध्या राज्यसभेचे खासदार असलेल्या अमित शहांना उमेदवारी द्यावी, अशी मागणी होत आहे.

कठीण वेळी भाजपला ‘अच्छे दिन’ दाखवणारा ‘लोहपुरूष’ अडगळीत गेला, अशी भावना कार्यकर्त्यांमध्ये आहे. अडवानी हे गुजरातची राजधानी असलेल्या गांधीनगरमधून सहावेळा लोकसभेवर निवडून गेलेले आहेत. शहा यांनी गांधीनगरमधून उमेदवारी मिळाली तर पंतप्रधान नरेंद्र मोदी पुन्हा वाराणसीतून लढण्याची शक्यता आहे. 2014 मध्ये मोदी वाराणसी आणि वडोदरा येथून निवडणूक लढले होते. भाजपला गेल्या लोकसभा निवडणुकीप्रमाणे गुजरातमध्ये मिशन 26 पूर्ण करायचे आहे. गेल्या निवडणुकीत त्यांनी सर्व 26 जागा जिंकल्या होत्या.