साध्वी प्रज्ञासिंहला खोट्या केसमध्ये अडकविले : अमित शहा 

कोलकता : भाजपचे राष्ट्रीय अध्यक्ष अमित शहा यांनी साध्वी प्रज्ञासिंह यांना खोट्या केसमध्ये अडकविले असल्याचे सांगितले. प्रज्ञासिंहांच्या विरोधात त्यांना हिंदू दहशतवादाच्या नावाखाली खोट्या केसमध्ये अडकविण्यात आले होते. यातून देशाच्या संस्कृतीला बदनाम करण्यात आले. तर न्यायालयात त्यांचा खटला खोटा असल्याचे सिद्ध झाले आहे, असे शहा यांनी कोलकता येथे आयोजित केलेल्या पत्रकार परिषदेत सांगितले. 

स्वामी असिमानंद आणि इतर हिंदूत्ववादी लोकांवर खोटे खटले दाखल करून त्यांना आरोपी बनविण्यात आले. तर समझौता एक्सप्रेसमध्ये स्फोट करणाऱ्यांना का सोडून देण्यात आले असा सवालही त्यांनी केला. 

पश्चिम बंगालमध्ये या वेळी परिवर्तन होणार. पहिल्या दोन टप्प्यातील निवडणुकांनंतर ममता बॅनर्जी यांना स्पष्टपणे पराभव दिसत आहे. त्यांना याची जाणीव झाली असल्यामुळे ममता आता विरोधकांवर व निवडणूक आयोगावर टीका करत आहेत. भाजप नेत्यांच्या सभेला परवानगी न देणाऱ्या ममतांनाच आता बंगालच्या जनतेने नाकारले आहे, असेही शहा यांनी यावेळी सांगितले.