Amritpal Singh : तुमच्याकडे ८० हजार पोलिस, तरी अमृतपाल...; उच्च न्यायालयाने पंजाब सरकारला फटकारलं

नवी दिल्ली - अमृतपाल सिंह यांच्या शोधासाठी अजूनही सर्च ऑपरेशन सुरू आहे. पंजाब पोलीस शनिवारपासून अमृतपालचा शोध घेत आहेत. दरम्यान, हे प्रकरण पंजाब आणि हरयाणा उच्च न्यायालयात पोहोचले आहे. अमृतपाल पळून गेल्याबद्दल पंजाब आणि हरयाणा उच्च न्यायालयाने पंजाब सरकारला फटकारले आहे.

अमृतपाल सिंग पळून गेल्याप्रकरणी उच्च न्यायालयाने मंगळवारी राज्य सरकारला फटकारले. आपल्याकडे ८० हजार पोलिस आहेत, तरीही तुम्ही अमृतपालला अटक का करू शकला नाहीत, असा सवाल हरियाणा आणि पंजाब उच्च न्यायालयाच्या खंडपीठाने पंजाबचे महाधिवक्ता विनोद घई यांना केला.

पंजाबचे महाधिवक्ता विनोद घई यांनी पंजाब आणि हरियाणा उच्च न्यायालयात सांगितले की, अमृतपाल सिंग याच्याविरोधात रासुका लावण्यात आला आहे. या प्रकरणाची सुनावणी करताना न्यायमूर्ती एन.एस. शेखावत यांनी तो कसा पळून गेला, असा सवाल महाधिवक्ता विनोद घई यांना विचारला.

या प्रकरणातील इतर आरोपींना अटक करण्यात आली आहे. या उत्तरानंतर खंडपीठाने अमृतपाल सिंग वगळता सर्वांना अटक कशी झाली, असा सवाल केला. आपल्याकडे ८० हजार पोलिस आहेत. त्याला अटक कशी झाली नाही? जर तो पळून गेला तर ते गुप्तचर यंत्रणेचे अपयश असल्याचं न्यायालयाने म्हटलं.