महिंद्रानी शेअर केलेल्या VIDEO वर नेटकऱ्यांनी शिकवले Traffic Rules

नवी दिल्ली : सोशल मीडियावरील युजर्संनी बुधवारी चक्क उद्योजक आनंद महिंद्रा (Anand Mahindra) यांना वाहतूक नियमांचे धडे शिकवले. आनंद महिंद्रांनी एक व्हिडिओ शेअर केला होता, ज्यात 'ड्रायव्हरलेस' बाईक दिसत होती. महिंद्रा समूहाच्या अध्यक्षांना हा व्हिडिओ खूपच आवडला आणि त्यांनी लगेचच कॅप्शनसह व्हिडिओ ट्विटरवर शेअर केला. मात्र, त्यांनी शेअर केलेल्या या व्हिडिओवर अनेकांनी भन्नाट प्रतिक्रिया देत महिंद्रांना सल्लाही दिलाय.

दोन दिवसांपूर्वी सोशल मीडिया प्लॅटफॉर्म ट्विटरवर @DoctorAjayita या वापरकर्त्यानं आपल्या अकाऊंटवर एक आश्चर्यकारक व्हिडिओ शेअर केलाय. या व्हिडिओत बाईकच्या मागच्या सीटवर एक माणूस बसलाय आणि समोरची ड्रायव्हरची सीट रिकामी आहे. आश्चर्याची गोष्ट म्हणजे, बाईक खूप वेगाने धावत असून हा व्हिडिओ पाहिल्यानंतर तुम्हालाही थोडा धक्काच बसेल. व्हिडिओ शेअर करताना, ट्विटर वापरकर्ता @DoctorAjayita डॉक्टर अजयितानं कॅप्शनमध्ये लिहिलंय, ‘एलोन मस्क म्हणाले, मला चालकविरहित वाहने भारतात आणायची आहेत’.

ट्विटरवर 85 लाखांहून अधिक फॉलोअर्स असलेल्या आनंद महिंद्रांनी हा व्हिडिओ आपल्या ट्विटर अकाऊंटवर शेअर केलाय. हा व्हिडिओ शेअर करताना आनंद महिंद्रा यांनी कॅप्शनमध्ये लिहिलंय, ‘खूप आवडले.. मुसाफिर हूं यारों.. ना ड्राइवर है, ना ठिकाना..’ लोकांना हा व्हिडिओ प्रचंड आवडला. तसेच, आनंद महिंद्रांनी दिलेलं हे कॅप्शनही त्यांच्या पसंतीस उतरलंय. सुमारे 30 सेकंदांचा हा व्हिडिओ अनेकांनी सोशल मीडियावर शेअर केलाय.