Gautam Gambhir : स्वतःला भारतीय म्हणवून घ्यायची लाज वाटते; भाजप खासदार गौतम गंभीर यांचे विधान

नवी दिल्ली: भारतीय जनता पक्षाचे (भाजप) खासदार गौतम गंभीर यांनी मणिपूरमधील दोन महिलांना विवस्त्र केल्याची घटना "अत्यंत लाजिरवाणी" असल्याचे म्हटले.

गौतम गंभीर यांनी शुक्रवारी म्हटलं की, स्वतःला भारतीय म्हणवून घेण्याची लाज वाटते. एका कार्यक्रमात पत्रकारांशी संवाद साधताना म्हटलं की, मणिपूरसारख्या घटना सामान्य घटना नाहीत. त्या होऊ न देणे हे राज्याच्या मुख्यमंत्र्यांचे कर्तव्य आहे.

गंभीर म्हणाला, “हे खूप लज्जास्पद आहे. मला स्वतःला भारतीय म्हणवून घेण्याची लाज वाटते, कारण हे प्रकरण फक्त मणिपूरपुरते मर्यादित नाही. यामुळे संपूर्ण देशाची मान खालावली आहे. त्यामुळे याचे राजकारण करू नये.

4 मे रोजीचा हा व्हिडिओ बुधवारी समोर आल्यानंतर मणिपूरच्या डोंगराळ भागात तणावाचे वातावरण आहे. एका बाजूचे काही लोक एका समाजातील दोन महिलांना नग्न करून त्यांची धिंड काढतांना व्हिडिओमध्ये दिसत आहे.

या घटनेवर विरोधी पक्ष राजकारण करत असल्याचा आरोप गंभीर यांनी केला. ते म्हणाले की, ही सर्व 140 कोटी भारतीयांसाठी शरमेची बाब आहे. दोन महिला किंवा मुलींच्या बाबतीत असे काही घडत असेल तर ती संपूर्ण देशासाठी शरमेची बाब आहे. तसेच मणिपूरसारखी घटना भविष्यात कोणत्याही राज्यात घडू नये.