नवी दिल्ली- भारतीय जनता पक्षाच्या आसाममधील एका उमेदवाराने बीफ हे 'राष्ट्रीय डिश' (national dish) असल्याचं वक्तव्य केलं होतं. याप्रकरणी भाजप उमेदवार बानेंद्र कुमार मुशाहारे (Banendra Kumar Mushahary) यांच्याविरोधात एफआयआर FIR दाखल करण्यात आला आहे. आसाममध्ये विधानसभेच्या निवडणुका होणार आहेत. यावेळी प्रचारादरम्यान भाजप उमेदवाराने अल्पसंख्याकांचा प्रभाव असलेल्या क्षेत्रात बीफ हे राष्ट्रीय डिश असल्याचे वक्तव्य केलं होतं. बानेंद्र कुमार मुशाहारे हे गौरीपूर मतदारसंघातून भाजपचे उमेदवार आहेत. त्यांच्या या वक्तव्यामुळे वाद निर्माण झालाय. बीफ हे राष्ट्रीय डिश असल्यामुळे आसामच नाही तर देशभरात यावर बंदी असू शकत नाही, असंही बानेंद्र कुमार म्हणाले होते. निवडणुकीला काही दिवस उरले असताना भाजप नेत्याच्या या वक्तव्यामुळे राजकीय वातावरण तापण्याची शक्यता आहे.
बीफ आपण खातो, त्यामुळे त्याच्यावर बंदी कशी असू शकते? असं बानेंद्र कुमार म्हणाले होते. या वक्तव्यानंतर अनेकांनी टीका केली. स्थानिक माध्यमातील बातम्यांनुसार, हिंदू ओईक्या मंचाच्या Hindu Oikya Mancha सदस्याने मुशाहारे यांच्याविरोधात दिसपूर पोलिस स्टेशनमध्ये एफआयआर दाखल केला आहे. तसेच मॉडेल कोड ऑफ कंडक्टचे उल्लंघन केल्याप्रकरणी त्यांच्यावर कारवाई करण्याची मागणी केली आहे. संघटनेने हा मुद्दा निवडणूक आयोगासमोरही उपस्थित केला आहे.
हिंदू ओईक्या मंचासह इतर काही संघटना बानेंद्र कुमार मुशाहारे यांच्याविरोधात आक्रमक झाल्याचे पाहायला मिळत आहे. मुशाहारे यांच्या वक्तव्याविरोधात दुबरी जिल्ह्यात निदर्शने करत विरोधकांनी निषेध व्यक्त केलाय. बानेंद्र कुमार यांचे वक्तव्य भाजपने अनेक राज्यांमध्ये घेतलेल्या भूमिकेपेक्षा वेगळे आहे. भाजपने अनेक राज्यांमध्ये बीफ बंदीची मागणी केली होती. पण, बानेंद्र कुमार आणि भाजप यांच्यामध्ये या मुद्द्याबाबत विरोधाभास दिसून येतोय. विशेष म्हणजे विरोधी पक्षांनी या मुद्द्यावरुन भाजपवर टीका केली आहे. भाजप राज्य पाहून आपली भूमिका बदलते का, असा प्रश्न विचारण्यात येत आहे. भाजपने सत्ता असूनही अनेक राज्यांमध्ये बीफवर बंदी घातली नाही, पण अनेक राज्यांमध्ये बीफ बंदीची जोरदार मागणी केली आहे. त्यामुळे त्यांची भूमिका परिस्थिती पाहून बदलत असल्याचा आरोप करण्यात येत आहे.
दरम्यान, बानेंद्र कुमार मुशाहारे याआधी बोडोलँड पीपील फ्रँटचे माजी आमदार होते. त्यांनी डिसेंबर 2020 मध्ये भाजपमध्ये प्रवेश केला. भाजपने त्यांना गौरीपुर मतदारसंघातून तिकीट दिले आहे. पण, मुशाहारे यांच्या वक्तव्यामुळे भाजप अडचणीत येण्याची शक्यता आहे. आसाममध्ये भाजपची सत्ता आहे. ओपेनियन पोलमध्ये आसाममध्ये भाजपच पुन्हा सरकार स्थापन करेल अशी शक्यता व्यक्त करण्यात आली आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.